26 гыч 28 март марте Москосо «Россия» национальный рӱдерын площадкыштыже «Движение Первых» IV погын лийын.
Марий Эл гыч тушто шым чолга еҥ участвоватлен.
Погын Российысе 89 кундем гыч 1500 утла участникым ушен. Нуно 2024 ийыште ышталтше пашам иктешленыт, тений у задаче-влакым ончылнышт шынденыт.
«Движение Первых» – йоча да самырык тукымын эн кугу толкынышт. Россий мучко тушко чылаже 12 миллион наре еҥ пурен. Нуно тӱрлӧ проектым илышыш шыҥдарат. Мутлан, «Большая перемена» Российысе конкурс ик эн кугу лийын. Тушко 3 миллион наре еҥ участвоватлен. «Благо твори» волонтёрский проект 1,5 миллион утла еҥым ушен. Идалык мучко волонтёр-влак 320 тӱжем утла поро пашам ыштеныт. «Зарница 2.0» Всероссийский военно-патриотический модышышто 800 тӱжем утла участник лийын, 80 кугыеҥ, нунын коклаште специальный военный операцийын ветеранже-влакат улыт, тушто наставник пашам ыштен.
Первый-влакын движенийыштын ик эн тӱҥ йыжыҥже – Самырык тукым тӱнямбал фестиваль. Тушко 78 эл гыч тӱжем утла еҥ ушнен, йоча организаций-влакын тӱнямбал ассоциацийышт ышталтын.
Погынышто «Келшымаш идалык» программе дене палыме лийыныт. Тудын почеш, идалык мучко келшымаш теме дене кылдалтше ятыр мероприятийым эртараш палемдыме. Мутлан, тӱрлӧ кундем, эл гыч молодёжный организаций-влакын представительышт дене телемост лиеш. Келшымаш идалыкын талисманже – Лапа пинеге. Тудын авторжо – Чуваш Республик гыч участник Гордей Васильев.
Погынышто Оршанке районын ӱдыржӧ, «Движение Первых» Марий Элысе региональный Советын представительже Яна Янина лийын. Тудо ойла:
– Погын моткоч чаплын эртен. Умылтараш лийдыме шижмаш чонемым авалтен. Тиде кугу событий кумылемым нӧлтен, ятыр идейым шочыктен да мемнан республикнан сай илышыж верч утларак тыршаш таратен. Мутлан, ончыкшым Оршанке районыштем «Зарница 2.0» военно-патриотический модмашлан ямдылалтме шотышто мероприятийым ыштынем.
Тӱрлӧ регион гыч толшо еҥ-влак дене палыме лиймеке умылышым: мемнан движенийыште уста да чолга ӱдыр-рвезе-влак улыт. У проектым, инициативым пырля илышыш пуртен, элланна пайдам кондена!
Погынын икымше кечынже участник-влакым Россий Президент Владимир Владимирович Путин саламлен. Тудым ужын, эшеат чот шулдыраҥынам. Тылеч посна ятыр палыме блогер да артист дене вашлийынна.