Самырык еҥ, тылат ӱшанена!

Таче самырык-влакын чыла вере шуаш тыршымышт куандара. Нуно илышым саемдымаште шагал огыл сомылым шуктат. Тыгай чолга еҥ-влак республикысе, районласе Молодёжный парламентыш чумыргеныт. Медведево районысо молодёжный парламентын пашаж дене палыме лийына.

Медведево посёлкысо 2-шо номеран школын тунемшыже Линара Наумовалан (фотошто)  Медведево районысо молодёжный парламентым 2022 ийыште вуйлаташ ӱшаненыт. Линара изи годсек чулым, чыла вере шуаш тыршыше, тӱрлӧ конкурсышто да школын илышыштыже усталыкше дене ойыртемалтын. Садлан тудын койыш-шоктышыжат ӱшаныме сомыллан  келшен толеш.

Мый шкемым тӱрлӧ вере тергенам. Завучын темлымыж почеш волонтёр пашалан кумылаҥынам. Ончыч шке посёлкышто да районышто тӱрлӧ поро сомылым шуктенна, вара республикысе да российысе кӱкшытан мероприятийлашке ушнаш тӱҥалынна. Школыштына воспитатлыме паша шотышто специалист Наталья Леонидовна мыланем электрон почтышкем Молодёжный парламентын у созывшын погынымашыж шотышто документым колтен. Тушто участвоватлаш темлен. Тидлан, кӱлеш документым оформитлен, самырык-влаклан могай пайдам ышташ лийме шотышто шке темлымашем дене палдаренам. Медведево районысо администрацийын вуйлатышыже, самырык-влак дене пашам ыштыше специалист-влак ты документ дене палыме лийыныт. Йодмашым пуышо кокла гыч икмыняр еҥым ойыреныт, тушто мыят лийынам. Тылеч вара мемнам погеныт, Молодёжный парламентын пашаж дене палдареныт. Тушто мыйым председательлан шогалтеныт. Медведево районысо Молодёжный парламентын председательже семын мый республикысе парламентын ик участникше улам. Нунын дене ме Кугыжаныш Погынын сессийышкыже коштына. Тыгак парламентын еҥже-влак дене заседанийым да моло вашлиймашым  эртарена, – палдарыш Линара.

Республикысе да районысо парламентын еҥже-влак кварталлан ик гана тӱшка вашлиймашыш погынат. Тушто нуно самырык-влакым тургыжландарыше йодышым каҥашат. Тӱҥ шотышто самырык ӱдыр-рвезе-влаклан могай полыш кӱлмӧ шотышто йодышым лончылат. Тидлан кӱлеш условийым келыштараш тыршат, специалист-влакымат шӱдат. Тыгак самырык-влакын политикышт, закон ончылно могай правашт улмо шотышто палдарат. Тылеч посна, шке шонымашыштым илышыш шыҥдараш манын, проект пашалан кумылаҥдат.

Молодёжный парламентын тӱҥ задачыже-влак:

– самырык тукымын проблемыж нерген верысе самоуправленийын органлашкыже лекташ. Тыгак самырык-влак дене пашам ыштыше районысо мэр организаций-влак нерген палдараш.

– Самырык-влакын проблемыштым решатлаш полшышо кугыжаныш, мер организаций-влак дене кылым ышташ.

– Самырык тукымын илышыжым саемдаш полшышо проект-влакым илышыш шыҥдараш манын, верласе специалист-влак дене погынымашым эртараш, кӱлеш консультацийым пуаш.

– Самырык-влакым районысо социально-политический илышыш ушнаш кумылаҥдаш.

– Нуным вуйлатыме сомылым шукташ, правовой ден политический тӱвырам вияҥдаш туныкташ. Тыгак чулым да чолга койышыштым аралаш.

Молодёжный парламент самырык-влакын проблемыштым решатлаш полшымо шотышто шукыж годым заседанийым эртара. Тушко парламентын экспертше ден специалистше-влакым ӱжыт. Тыгак «йыргешке ӱстелыш», конференцийыш, совещанийыш, семинарыш погынат. Парламентын еҥже-влак депутат-шамычын эртарыме заседанийышкышт, сессийышкышт ушнат. Верысе самоуправлений органлашке кӱлеш йодышым чын оформитлаш полшат. Тидлан экспертно-аналитический, информационный материал-влакым ямдылат. Районысо социально-экономический йодышым саемдаш манын, грантым налаш лийме шотышто проектым илышыш шыҥдараш полшат.

«Кызыт самырык-влакым мо тургыжландара?» – йодым Линара деч.  Вашмут тыгайрак лие:

Районлаште самырык-влакым инфраструктур ситыдымылык тургыжландара. Тиде йодышым рашемдаш полшаш манын, ме, парламентын еҥже-влак, проектым возаш кумылаҥдышаш улына. Тыге нуно шке посёлкыштым але ялыштым тӱзатымаште кугу шӱкалтышым ыштен кертыт. Мутат уке, тидлан специалист-влак дене тӱрлӧ вашлиймашым организоватлена. Адакшым ятыр самырык еҥ мемнан нерген огешат пале. Тидланже ме соцкыллаште лӱмын группым почынна. Тушто шке пашана дене палдарена. Мемнан пашанам самырык-влакын политикышт шотышто специалист-влак курироватлат. Нунак проблемым решатлымаште кугу полышым шуктат.

Медведево районысо Молодёжный парламентыште коло утла самырык еҥ шотлалтеш. Нуно тӱрлӧ вер гыч улыт. Икте, мутлан, Медведево посёлкышто ила гын, весе – Куяр посёлкышто. Парламентыш самырык еҥ-влакым гражданский позицийыштым ончыктен моштышо, илышыште шке верыштым палыше, чолга да чулым койышышт дене ойыреныт.

2022 ийыште ты районысо парламент визымше созывлан у состав дене пашам шукташ тӱҥалын. Ик созыв кок ий пашам ышта. Лишыл жапыште Медведево районысо молодёжный парламент ты районысо самырык еҥ-влак дене кугу вашлиймашым эртараш шона. Тушто район администрацийым вуйлатышат лийшаш. Вашлиймаш годым самырык еҥ-влак нуным кызыт мо тургыжландара, шке илыме верыштым кузе вияҥдаш лийме шотышто шке шонымашышт дене палдарен кертыт. Тыгай вашлиймашын лектышыжат, очыни, саяк лийшаш. Кызытсе самырык тукым илыш дене тӧр каяш тырша, кушто да мом ышталтмым кугыеҥ-влак дечат шукырак пала. Садлан нунын шонымашышт илышым вораҥдарымаште да семдымаште кугу полышым ыштен кертеш манын ӱшанена.