Автор — Дарья БЫКОВА
Энергетике системыште пашам ыштыше-влак 22 декабрьыште профессионал пайремыштым палемдат. Нунылан кӧра пӧртыштӧ, школышто, эмлымверыште эре шокшо да волгыдо. Таче «Медведевский ПМК» ООО-н тӱҥ энергетикше дене мутланена.
Артём Герантьевич Михайлов – самырык специалист. Параньга районысо Ермучаш ялеш марий ешеш шочын-кушкын. Матародо школышто тунеммыж годым физике ден геометрийым йӧратен.
– Школ деч вара Йошкар-Оласе аграрный колледжыште техник-электриклан тунемынам. Вара армийыште служитленам. Пӧртылмеке, йолташем дене пырля Москошто нефтеперегонный заводышто электромонтёрлан ыштенна. Тыгодымак у да оҥайрак профессий нерген шонаш тӱҥалынам, вет мый кугурак кӱкшытыш шуын кертмем шижынам. Тыге Марий кугыжаныш университетыш энергетиклан заочно тунемаш пуренам. Дипломым налмеке, ты специальность дене пашам кычалаш тӱҥалынам. Интернетыште «Медведевский ПМК-ште» вакансийым муынам. Мыйым ик тылзаш испытательный срокыш налыныт. Тудым сайын эртарымек, тӱҥ энергетиклан шогалтеныт, – ойла А.Михайлов.
Кызыт Артём Герантьевич тӱрлӧ сомыллан мутым куча: столярный да сварочный цех-влакым вуйлата, электроснабженийым, газоснабженийым, водоснабженийым, водоотведенийым, канализацийым, сетевой связьым, освещенийым эскера. Тыгак сеть-влак деке подключатлалташ технический условий шотышто кутырен келша, объект-влакым эксплуатацийыш колташ онча.
– Паша кеч-куштат вигак куштылгын огеш кай. Тыге мыйынат тӱрлӧ нелылык лектын. Икымше арнянак Роспотребнадзор тергымаш дене толын. Пашаеҥ-влак денат вашкылым муаш, кажныж дене мутланен мошташ тунемынам. Сомылем пеш ответственный, кӱчык жапыште пашам вашке ыштыман, срокышко пурыман, а стройкышто тӱрлыжат лиеш. Но чылалан тунем шуынам. Ӧрканаш огеш кӱл, тунам паша воранен толеш, – палемда тӱҥ энергетик.
«Мо дене тиде профессий келша?» йодмемлан тыге вашештыш:
– Ты пашам мый йӧратем. Тидлан лӱмынак тунемынам, кызыт нимынярат ом ӧкынӧ. Мыйын шонымаште, тудо эре йодмашан лиеш.
Яра жапыште А.Михайлов спорт дене кылым куча. Кеҥежым куржталеш, телым ече дене коштеш. Тыгак тудын кок икшывыже уло: куд ияш эрге да ныл ияш ӱдыр. Ешыж дене пырля жапым эртараш йӧрата: лишыл родышт деке унала миен толыт, кеҥежым пӱртӱсыш коштыт, телым курыкышто мунчалтат.
– Машина дене кудал эртен кайыме годым ыштыме объектнам йоча-влаклан ончыктем, краным ужыт гын, ӧрынат колтат, тӱрлӧ йодышым пуат, вара мый нунылан умылтарем, – ойла Артём Герантьевич.
Кызыт А.Михайлов шке пашаеҥже дене икмыняр объектыште тыршат: ТЮЗ-м реконструироватлат, Фестивальный микрорайонышто икымше пӧртым сдатлаш ямдылалтыт, весыжым чоҥат. Тыгак ончыч Чебоксар олаштат сомылыштым шуктен шогеныт.
А.Михайловын альбомжо гыч налме фото.
Тӱҥ энергетик деч икмыняр ой-каҥаш
1. Мӧҥгыштыда светодиодный волгалтарыше приборым кучылтса.
2. Выключатель олмеш движений датчикым шындыза.
3. Газ котёл дене шке ырыкташ лийман пачерым налаш пайдалырак, тыге окса сайын аныклалтеш.
4. Холодильникым шокшо верыште ида вераҥде, уке гын роскот кугу лиеш.
5. Электрочайникым йошкын деч эрыктыза, вӱдым ырыкташ электротул шагалрак кая.
6. Пӧрт гыч лекмек, тулым йӧрташ ида мондо.