Кундемыштына талантан самырык еҥ-шамычлан «МолодЙошка» республикысе форум эртаралтын. Тушко 200 наре чолга ӱдыр-рвезе ушнен. Нуно Куяр посёлкысо «Авангард» военно-патриотический рӱдерыште тӱрлӧ шӧрыныштӧ вияҥытыт, мастарлыкыштым нӧлтеныт.
Участник-влаклан куд тӱрлӧ йыжыҥыште шуаралташ йӧн лийын. Кажне кече могай-гынат темылан пӧлеклалтын. Тидым тӱрлӧ тренинг, лекций да мутланымаш гоч ыштеныт. Вич кече жапыште самырык еҥ-шамыч шке пашаштым калыклан палдараш, социально кӱлешан проект-влакым илышыш шыҥдараш, илышыште вашлиялтше ситуацийым решатлаш тунемыныт.
Тылеч посна кундемнан лӱмлӧ еҥже-шамыч дене вашлийыныт. Тӱҥ шотышто нуно участник-шамыч ончылно спикер семын выступатленыт. Тыгодым вашмутланымашыш кумылын ушненыт. Тыште ӱдыр-рвезе-шамыч тургыжландарыше йодыш-влаклан вашмутым муыныт.
Форумышто кажне тат могай-гынат мероприятий дене кылдалтын. А кастене шеф-повар-шамычын ӱчашымашыш, тул воктене гитар почеш мурымашыш, национальный модмашыш ушненыт. Икманаш, ты форумышто кажне самырык еҥ шканже могай-гынат пайдам налын кертын.
Ты форумын ик эн тӱҥ ужашыжлан грантовый конкурс шотлалтын. Росмолодёжьын конкурсышкышо ушнышо кажне участник шке шонымашыжым илышыш шыҥдараш 1 миллион теҥге наре оксам сеҥен налын.
18 августышто форумым официально мучашлыме годым сеҥыше-влакым палемденыт да сылне концерт дене саламленыт.
Оҥай, весела да пайдале,
Лач тыгай лийыт форум-влак – пале!
Ксения Резвых, участник:
– Ты форумыш ушнымемын тӱҥ амалже – проект паша нерген сайынрак пален налаш. Ончыкыжым проектым возаш да тудым илышыш шыҥдараш шонымаш уло. Тидланже «МолодЙошка» йӧным ышта. Республикыште илыше самырык еҥ-шамычлан тыгай кугу мероприятий эртаралтмылан моткоч йывыртенам. Вет форумыш кундемнан эн тале, чолга, талантан ӱдыр-рвезыже-влак чумыргеныт. Нуно лӱдде да вожылде шке шонымашышт нерген ойлат, илышым саемдыме шотышто тӱрлӧ проект-влакым темлат. Кузе тыгай самырык еҥ-влак дене от куане?
Вич кече жапыште тӱняумылымашем вашталтын манаш лиеш. Вет тыште ойырен налме направлением почеш келге шинчымашым налынам, у йолташ-влакым муынам, лӱмлӧ еҥ-шамыч дене палыме лийынам. Садлан вес ийынат форумыш ушнаш шонем.
Ӱдыр вес ийынат форумыш ушнаш шона.
Ксения Резвыхын колтымо фотожо-влак.