14 декабрьыште В.М.Васильев лӱмеш МарНИИЯЛИ-ште «Исполком председатель: кугыжаныш да мер пашаеҥ Иван Петрович Петровын 130 ияш лӱмгечыжлан пӧлеклалтше «йыргешке ӱстел» эртаралтын.
Тылеч ончыч Йошкар-Оласе Петров уремын 2-шо номеран пӧрт пырдыжыште кечыше шарнымаш оҥаж воктеке пеледышым пыштеныт. А вара марий калыкын лӱмлӧ эргыже Иван Петровын илыш корныж да пашаж нерген институтын кугурак научный пашаеҥже, историй науко кандидат Олег Петров каласкален. МарГУ-н профессоржо, историй науко доктор Алексей Иванов «Война телеграмм: И.П.Петров и продовольственный вопрос в МАО в начале 1920-х годов» докладым темлен. МарГУ-н доцентше, историй науко кандидат Родион Чузаев 1920-шо ийлаште Маробластьым вуйлатыше-влакын ончыкылыклан кундемым вияҥдыме да национальный йодышла шотышто пунчал-шамычым луктедымышт нерген ойлен.
Ты кечынак кастене М.Шкетан лӱмеш Марий драмтеатрыште «Тудын ӱмыр – волгыдо шӱдыр» шарнымаш кас лийын. Тусо сценыште «Марий Эл», «Марий памаш», «Морко кундем» ансамбль-шамыч, профессионал артист ден мурызо-влак выступатленыт.
13 декабрьыште Морко район Шеҥше селаште И.П.Петровым шарныме мероприятий-влак тӱвыра пӧртыштӧ да школышто эртаралтыныт.
И.П.Петров нерген тӱрыс статьям «Кугарня» газетыште лудса.