5 мартыште Карелий Республикын Национальный тоштерыштыже писатель Яна Жемойтелитен «В поисках мельницы Сампо» книган презентацийже лийын.
Савыктышыште Карелийысе сӧрал мотор вершӧрлам кум рвезын ончен коштмыжо, тошто легендым, илышым пален налме нерген ойлалтеш. Книгасе герой-влак юж шар дене Валаамыште, Паанаярвиште, Петрозаводскышто лийыт да учёный-шамыч дене пырля Кивач вӱдшуҥгалтышым, Марциальные Воды посёлкым, Кижи отром ончаш каят. Тыгак нуно Онежское ер воктене петроглиф-влакым ужыт, Вяйнемейнен, Ильмаринен да Петр Первый дене вашлийын мутланат.