Самара гыч турист-влак толыт

Марий Эл «Яркие выходные в Приволжье» проектышке ушнен. 10 апрельыште Самара гыч Йошкар-Олашке поезд дене 342 турист толеш.  Нуно ик кече жапыште рӱдолан сылне, чапланыше верлажым ончен лектын, марий калыкнан тӱвыраже, фольклоржо дене палыме лийын кертыт.

«Самара – Йошкар-Ола – Самара» туристический поезд – «Яркие выходные в Приволжье» регион-влак кокласе проектын ик ужашыже. Ты проектыш эше Ижевск, Саранск, Пенза, Ульяновск, Озаҥ, Саратов ола-влак ушненыт.

2020 ийыште Марий Элын «Шелковый путь» туроператоржо «Марий Элыште кӱртньыгорно туризмым ыштыме» авторский проект дене «Ме Марий Элышке каена» грантлан йодмашым пуэн. Пашаштым шуко специалист ончен лектын, кӱкшын аклен. Тыге нуно федеральный грантым сеҥен налыныт. Лач тидыжак кундемыштына кӱртньыгорно туризмлан вияҥаш негызым ыштен.

«Тиддене ме пашанам мучашлен огынал. Тений 2-4 февральыште Саранск олаште эртаралтше Российысе «Туристический маршрут года» конкурсышто кок номинацийыште участвоватленна: иктыштыже 2-шо вер дене палемдалтна, весыштыже 3-шо верым нална. Ты мероприятийыште лийме годым кӱртньыгорно туризм дене пашам ыштыше еҥ-влак дене пеҥгыде кылым ыштенна. Тыге «Яркие выходные Приволжья» проект шочын. Юл кундемысе кандаш ола ты проектышке ушнен.

 Мемнан деке Самара ола гыч турист-влак 10, 17 апрельыште толшаш улыт. Билет-влакым вашке налын пытареныт. Умбакыжат ты маршрут-влак шотышто йодышым рашемдаш тӱҥалына», – каласен А.Даминов.

Ансар Зиннуровичын мутшо почеш, турист-влак Йошкар-Олаште 8 шагат эр гыч 20 шагат марте лийыт. Кӱртньыгорно вокзалыште уна-влакым марий коллектив-влакын выступленийышт дене вашлийыт. Вара Йошкар-Олан чапле верлажым ончыктат. М.Шкетан лӱмеш Марий драмтеатрыште нунылан фольклор сынан программе ямдылалтеш. Лӱмынак нунылан Йошкар-Оласе Чарла кремльыште кидмастар-влакын ярмиҥгашт почылтеш. Турист-влаклан шке семын ончен кошташат яра жап пуалтеш. Кастене турист-влакым мӧҥгӧ ужатат.

Туристический поездым илышыш пуртымаш республик нерген пален налаш шуко туристым кумылаҥден кертеш.