2 декабрьыште Йошкар-Оласе 28-ше номеран лицейын пырдыжышкыже гвардийын рядовойжо, Патырлык орденын кавалерже, СВО-што вуйым пыштыше Владимир Смирновым шарныме лӱмеш мемориал оҥам пижыктыме. Тудым «Знамя Победы: наследие и будущее» проект почеш ыштыме.
Владимир военный ешыште шочын-кушкын. Изинек чолга да чыла вере шуаш тыршыше кушкын. Тӱналтыш класслам Семёновко селасе 21-ше номеран школышто тунемын. 2011 ий годсек Йошкар-Оласе 28-ше номеран лицейын физико-математический классыштыже шинчымашыжым нӧлтен. Йошкар-Оласе Олимпийский резерв школын волейбол секцийыштыже шуаралтын. 2018 ийыште Политехыш «Промышленное и гражданское строительство» йыжыҥ почеш тунемаш пурен. 2024 ий 5 октябрьыште Россий Обороно министерстве дене контрактым пеҥгыдемден да СВО-ш каен. 2024 ий 1 декабрьыште Курск областьысе Новоивановка села воктене колен.