Марий Элым Вуйлатыше Ю.Зайцевын кӱштымыж почеш «Победная почта» проектым илышыш пуртымо.
26 июльышто Йошкар-Оласе Рӱдӧ паркыш пурымаште «Наши Герои» фотоончер кумдыкышто Андрей Виногоров ден Алексей Фоминых (Йошкар-Олаште социально-значимый проект-влакын координаторышт) олаште илыше моло еҥ-влак дене пырля СВО-ш салтак-шамычлан серышым возеныт.
Ты кумдыкышто кеч-кӧ СВО-н участникшылан серышым возен кертеш. Бланкыште возымо серышым яшлыкыш пыштыман. Серышым погымо пункт Рӱдӧ паркыш пурымаште кугарнян 17 гыч 20 шагат марте, шуматкечын да рушарнян 15 гыч 20 шагат марте ышта.
Тыгак тыште йоча-шамычлан 3D-ручка дене талисманым ыштыме мастер-класс эртаралтеш. Талисманым шкан кодаш але СВО-ш колташ волонтёрлан пуаш лиеш.
«Наши Герои» площадкыште экраным да интерактивный фотогалерейым вераҥдыме. Тушто СВО-што участвоватлыше салтак-шамычын подвигышт, биографийышт, наградышт нерген пален налаш лиеш. Тыгак сеҥымашым лишемдаш полшышо, гуманитарный полышым погымаште тыршыше кажне еҥ нерген ончыктымо.
«Марий Эл» увер агентствын фотожо.