Еш, йӧратымаш, да икте-весылан ӱшанле улмо кече вашеш «Защитники Отечества» фонд «Наша семья – наша победа» проектым илышыш шыҥдарен. Тудын почеш СВО участник да нунын ешышт нерген каласкалат.
Младший лейтенант Александр Князев – ты проектын ик еҥже. Элыштына частичный мобилизацийым увертарымеке, Александрын шуко йолташыжлан повестке толын, тудлан – уке. Тылеч вара пӧръеҥ шкеак военкоматыш каен да СВО-ш каяш ямде улмыж нерген ойлен. Мӧҥгыштыжӧ вич икшыве ачаштын сӧй гыч илыше пӧртылмыжлан ӱшанен да вучен.
– Сӧйыштӧ кредалше кеч-могай салтаклан вийым да ӱнарым еш пуа. Нунылан кӧра салтак шке элже да йӧратыме еҥышт верч лӱддымын шога. Тыгак йоча-шамыч деч налме серыш-влак шӱм-чоным ырыктат, нуным лудын, мӧҥгыштӧ улметым да чон-шокшым шижат, – ойла Князев.
Передовойышто кажне кечын тале кредалмаш-влак каят. Ик тыгай кредалмаште Александр нелын сусырген да йол деч посна кодын. Тунам мемнан-шамыч ӱмбалне кечыгут гаяк «кайык-шамыч» чоҥештылыныт да гранатым кышкеныт, шарналта салтак. Но рвезе тидын дене илышлан ӱшаным йомдарен огыл. Шучко пуламыр, мӧҥгешла, тудын кажне татшылан куанаш да йывыртен илаш таратен. А.Князевым «За отвагу» медаль дене наградитленыт. Но эн кугу наградыжлан ешыж деке илыше пӧртылмыжым шотла. Тидланже нунылан таушта.
Ветераным республикысе паралимпиец-влакын толкынышкышт ушнаш кумылаҥденыт. Князев, следж-хоккей дене кундемнан сборный командыжын – вратарьже. Ты толкынын еҥже улмыланат тудо таушта. Следж-хоккейлан кӧра салтак костыль дене тӧр кошташ тунемын. Тыгак спортышто сай лектышыш шуаш тыршаш кумылаҥмышт нергенат ойлыш. Вет республикысе команде спортын ты видыштыже шукерте огыл вияҥаш тӱҥалын, садлан эше чылажат ончылно, манеш.
«Защитники Отечества» фондын Марий Элысе пӧлкажын сайтше гыч налме фото.