Марий кундемыштына СВО-што улшо салтак-влаклан тӱрлӧ семын полшат. Волжский районысо шуко ялыште таче ты кӱлешан пашам шуктат.
Мо кӱлешым погат
Чодыраялыште 23 февраль вашеш гына салтак-влаклан гуманитарный полышым погеныт. Боец-влак выньыкым пеш йодыт, маныт. Сандене тиде гана эше 25 мужыр куэ выньыкым фронтыш колтеныт. Верысе «Чоткар патыр» ансамбльын участницыже-влак нунылан ковыштам шопыктареныт, коям шинчалтеныт, тыгак южышт кӱпчыкшӱргӧ (наволочко) ден кӱчык йолашым (трусикым) ургеныт. Клубым вуйлатыше Зинаида Михайловна Петрова гуманитарный полышым погымо пашам виктарен шога. Лишыл жапыште эше тыгай полышым пуышаш улыт.
– Тидлан ме ӱмаште шыжым пижна. Чылаже кум гана гуманитарный полышым пуэнна. Тидын шотышто ялысе еҥ-влак моткоч молодец улыт. Клубышко толыт да мо кӱлешым шкеак кондат. Вара, поген ситарымеке, чыла тидым Памарыш ик рвезе наҥгая.
Ме тушонкым, консервым, газ баллоным, кужу жап аралыме тӱрлӧ пучымышым, рожким, сакырложашым, шере кочкышым, носким, перчаткым, шокшо йолашым, тувырым, маскироватлыме костюмым, телылан ямдылыме салатым, шинчалтыме киярым, вареньым, тыгак свежа кешырым, шоганым, чеснокым, пареҥгым да молымат колтенна.
Спецоперацийыште эргымат кредалеш. Донецкышке ӱдырем, веҥым, шешкым, племянницем кум гана машина дене миеныт да посылкым тушан коденыт, – мане З.М.Петрова.
Сетьым пидыт, сортам ыштат
Упшер кундемыштат паша талын кая. Тыште салтак-шамычлан окопысо сортам ыштат, маскировочный сетьым пидыт. Кызытеш СВО-шко 15 сетьым, 1800 окопысо сортам колтеныт. Ты пашан кузе шукталтмыж нерген Упшер клубым вуйлатыше Галина Андреевна Никитина тыгерак мане:
– Ӱмаште шыжым окопысо сортам ышташ тӱҥалынна. Тидлан кукурузо, консерве деч кодшо да моло яра калай банкым шуко погенна. Тыгай сортам ышташ кож, пӱнчӧ пӱгыльмым, парафиным, ладаным, сортавундашым (огаркым) кучылтынна. Паша моткоч кӱжгӧ ыле.
Вара маскировочный сетьым пидаш тӱҥалынна. Тидлан ургымо цехла гыч кодшо материалым кучылтынна. Вара агроспаным налынна. Мутлан, телым ош тӱсаным, шошым да шыжым камуфляжный сынаным. Ме галстук формо дене сетьым пидына. Тидым ончет да, шинчавӱдат шкеак лектеш. Салтак-влаклан тушто куштылго огыл. Жапыштыже кочкашышт огеш логал, черланат.
Клубышто гуманитарный полышым погена. Тыгак шуко носким пидын колтымо. Йоча-шамыч поро тыланымашан серышым возат, южо йоча аралтышан кидшолым ышта.
Концертым ончыктеныт
29 февральыште Пӧтъял кыдалаш школышто СВО-што улшо салтак-влак лӱмеш «Из дома с любовью» поро кумылым ончыктымо концертым шынденыт. Ты пайремыш туныктышо, тунемше, школ пашаеҥ-влак ушненыт. Еҥ-влак шукын погыненыт. Уна семын тушко Марий Эл Республикысе Кугыжаныш Погын Председательын алмаштышыже Л.Н.Яковлева, республикысе Кугыжаныш Погынын депутатше Н.В.Пушкина да молат лийыныт.
Концерт кок шагат шуйнен, шуко еҥын чонжым тарватен, шинчавӱдым луктын. Патриотизм шӱлышан тӱрлӧ мурым муреныт, куштымашым ончыктеныт. Концерт сайын эртен, Ыштен налме окса дене СВО-што улшо салтак-влаклан мо кӱлешым налын колтат.
Марий кундемнан тӱрлӧ верыштыже таче тыгай полышым пуат, сайлан ӱшанен илат. Тидлан нуным пагалыман да пашаштым аклыман. Кажне еҥ, ты поро пашаш ушнен, фронтлан пайдам конден кертеш. Тидлан кумыл гына лийже!