Советский район Öрша кундем гыч Украиныште специальный военный операцийыште 22 пöръеҥ Шочмо элым арала. Авашт, ковашт, шочшышт нунылан кертмышт семын полшаш тыршат. Йоча-влакат ӧрдыжеш огыт код.
Öрша селасе Косьма ден Дамиан черке пелен Рушарня школ кеҥежымат омсажым петырен огыл. Йоча-влак Татьяна Николаевна Нагаеван, Анастасия Григорьевна Кропотован вуйлатымышт почеш кугу волонтёр пашам ыштен шогеныт. Эр гыч 14 шагат марте кугыеҥ-влак тыршеныт гын, 18 шагат деч вара йоча-влак СВО-што улшо салтак-влаклан армейский душым ыштеныт.
Тиде пашам шуктымашке 7-14 ияш йоча-влак коштыныт, вет шукыштын ачашт СВО-што лÿддымын кредалыт. Ты пашашке Ӧрша, Вечын школлаште тунемше-влак веле огыл, селашкына унала толшо йоча-влакат ушненыт.
Тыгак тиде пашашке Вечын школышто туныктышо Эльвира Валентиновна Иванова, Öрша школышто туныктышо Роза Геннадиевна Антропова, предприниматель, «Родник» кевытын озаже Надежда Тойбулатовна Михайлова пашам ворандараш чот полшеныт.
Чылаже 1700 армейский душым ыштыме. Тудым тÿрлö вере колтымо. Салтак-влак мыланна, таум ыштен, видеозаписьым колтат. Тыге ме палена: тыршымына арам огыл.
Анастасия Кропотова, Советский район Вечын кыдалаш школын туныктышыжо.
