27 май марте Йошкар-Оласе калык прикладной сымыктыш тоштерыште «Техника Великой Победы» выставкыш миен толаш лиеш.
Кугу Ачамланде сарыште тӱрлӧ боевой саргурал ден технике деч посна сеҥаш огеш лий ыле. Совет конструктор-влакын усталыкыштлан кӧра маневран танк, боевой самолёт, миноносец да пулемёт-влак ышталтыныт. Выставкыште кумдан палыме техникын, мутлан, Т-34 танкын, Пе-2 пикирующий бомбардировщикын, Як-3 истребительын модельышт ончыкталтыныт.
Нуным моделист-влак В.Урусов ден А.Кирилов погеныт.
– Валерий Урусов – калык просвещенийын отличникше, Марий Элысе образованийын сулло пашаеҥже. Шке жапыштыже Валерий Александрович судомодельный спорт шотышто Российысе да тӱнямбал таҥасымашлаште 1-ше категориян судья лийын. Кызыт сулен налме канышыште тудо йӧратыме пашажым – ракете да корабль-влакын модельыштым пога.
А Андрей Кирилов моделирований дене 30 ий утла заниматла, тоштернан научно-просветительский пашаштыже чолган шкенжым ончыкта, – палдарыш калык прикладной сымыктыш тоштерым вуйлатыше Татьяна Матвеева. 
Выставкыште тылеч посна салтак солык ончыкталтеш. Тушто 49 салтакын лӱмыштым, кушеч улмыштым, сар годым колымыштым, йоммыштым але сарым эртымыштым возымо. Салтак колен гын, лӱмжым йошкар куэман солыкыш возымо, увер деч посна йомын гын – ош куэмыш, сар деч вара колен гын – пелганде тӱсаныш. Тиде солыкым районласе чолга еҥ-влак, фронтовикын родышт ышташ полшеныт.
И.Речкинын фотожо-влак.