Сеҥымашын 50 процентше тылын полышыж деч шога, маныт. Тидым «Сердце матери» толкынын еҥже-влак сайын палат да шкенан-влаклан полышым чумырен колтымаште кугу пашам шуктен шогат. А СВО гыч пӧртылшӧ салтак-влакым волонтёр-шамыч кажне гана шокшын вашлийыт.
Кодшо арнян ик тыгай вашлиймашке «Иваныч» позывноян (2023 ий апрельыште контрактым подписатлен, СВО-ш каен) боец толын ыле. Пӧръеҥ Запорожский направленийыште артиллерийыште порысшым шукта. Весыже – танковый войскаште служитлыше «Балу» позывноян салтак (2022 ий сентябрь гыч фронтышто, контрактник).
«Шьём для наших» движенийын еҥже-влак салтак-шамычлан маскироватлалташ полшышо вургемым ургат да фронтыш колтат. Иктыжым чиен ончыде ышт чыте. Куштылго да лӱмын келыштарыме сынан куэм гыч ургымо тыгай вургем шокшо игечыште моткоч йӧнан, тудо ок пӱжалтаре да кечыйол деч арала манын палемдышт пӧръеҥ-влак.
Вашлиймашке Игорь лӱман волонтёр толын ыле, тудо,фронтлан кӱлеш арверым 3D принтер дене пластик гыч печатла. Иктыжым, гранатым кӱлеш верыш намиен кудалташ (дроныш пижыкталтеш) настам, волонтёр салтак-влаклан ончыктыш.
Кызыт фронтлан эше «Покров-4» РЭБ-м (радиоэлектронный лӱдыкшыдымылык арвер) погат. Тудо тушманын дронжо деч аралалташ сайынак полшышаш. «Покров-4» могай ужаш гыч шога, кузе тудын дене пайдаланыман, салтак-влаклан умылтарен ончыктышт.
– Тыгай полыш моткоч кӱлешан. Мландымбаке волен шичмышт годым дрон-влакын «шулдырышт» (лопастьышт) чӱчкыдын шалана. Тыгайымат 3D принтер дене печатлаш йӧнан ыле. Дизельный генератор, раций-влак поснак шуко кӱлыт. Техникылан шапаш ужашым, осколко дене шӱтлышӧ оравам чӱчкыдын вашталташ логалеш. Землякна-влак деч полышым эреак шижына, тидлан кугу таум каласена. Полышда южгунам илышымат утарен кода, – палемдышт «Иваныч» ден «Балу».
– Ме палена, салтак-влак мемнан полышлан кугун ӱшанат. А нуно сеҥымашыш шуаш чыла ыштат манын, меат ӱшанена, – вашештышт «Сердце матери» толкынын чолга волонтёржо-шамыч.
Авторын фотожо.