М.Шкетан лӱмеш Марий драмтеатрын сценыштыже шагал огыл самырык актёр ден актрисе-влакым ужаш лиеш. Кажныже талантан, уста, кӧргӧ вий-куатан да шкешотан. Лывыргын мутланен колтат, куштылгын кушталтат да яндар йӱк дене сылнын муралтат. Образымат сайын чоҥен моштат, пуйто геройын илышыж дене илат. Нунын кокла гыч иктыже – М.С.Щепкин лӱмеш кӱшыл театральный училищым 2015 ийыште тунем пытарыше, Советский район Кужмарий селаште шочын-кушшо, театрыште куд ий пашам ыштыше самырык актрисе Светлана Александрова.
Концертым эре ончыктеныт
Ты театрышке спектакльым ончаш мийыме годым сценыште модшо мотор чурийвылышан, кугурак капан, яндар йӱкан актрисын устан модмыжым шуко гана куанен онченам.
Светлана изиж годсек усталык шӱлышан кушкын. Поснак сценыште модаш йӧратен. Ирина шӱжарже дене эре концертым ончыктеныт.
«Кеҥеж канышлан Морко район Марий Кужер ялышке кокам деке унала коштынна. Тушто икшыве, кугыеҥ-влаклан лӱдде-вожылде изирак концертым ончыктена ыле. Тидлан номер-влакат ситыше лийыныт. Ме утларакшым сценкым модын ончыкташ йӧратенна. Концерт пытымеке, мыланна кампеткым пуат ыле. Пеш оҥай лийын. Ме изи годсек артист гай кушкынна», – шыргыж пелештыш Света.
А кугурак класслаште тунеммыж годым тудо Кужмарий тӱвыра пӧрт пеленысе «Эр ӱжара» фолькор ансамбльыш кошташ тӱҥалын. Но эре гастроль дене лектын коштмо тунемаш мешаен. Сандене коллектив гыч каяш логалын.
100 баллым поген
Светланан 1-ше гыч 9-ше классла марте шочмо Кужмарий школышто, варажым Ӱшнӱр школышто гумманитарный классыште тунемын.
«МарГУ гыч толшо туныктышо-влак марий йылме да литератур дене келге шинчымашым пуэныт. Сандене шочмо йылме да литератур предметлам йӧратенам. 11-ше классыште тунемме годым марий литератур дене Йошкар-Олаште эртыше регион-влак кокласе олимпиадыште 100 баллым погенам ыле. Ты балл дене вузышко экзаменым кучыде тунемаш пураш йӧн лийын», – ойла С.Александрова.
Туныктышо лийнеже улмаш, но…
Сайын тунемше ӱдыр ончыкылыкшымат туныктымо паша але журналистике дене кылдаш шонен. Но йӧршын вес корным ойырен налын. 11-ше классыште тунеммыж годым Ӱшнӱр школышко М.Шкетан лӱмеш Марий драмтеатр гыч Марий Элын калык артистше, режиссёр Василий Домрачев, театрын тӱҥ режиссёржо, актёр Роман Алексеев толыныт. Нуно Москошко Щепкин лӱмеш кӱшыл театральный училищышке тунемаш кумылан-влакым погеныт. Тунам Светлана икымше гана актрисе профессий нерген шоналтен.
«Школ деч вара МарГУ-шко финно-угроведений институтышко (кызыт Калыкле тӱвыра да тӱвыра кокласе коммуникаций институт) документ-влакым намиен пуэнам. Но чонем кастингыш миен толаш йодын. Тудо Шкетан лӱмеш Марий драмтеатрыште эртен. Кертам але уке, садак кайышым. Тушко Моско гыч туныктышо-влак толыныт ыле. Почеламутым, прозым, басньым рушла да марла ойлаш кӱлын. Куштыман ыле. Мый дечем тунам ик туныктышо чыганла кушташ йодо. А мые ӧрынам веле. Вет марий куштымаш деч молым омат пале. Куштен ончыктенам. Лекте веле. Тыге кум турым сайын эртенам. Варажым МарГУ гыч документым мӧҥгеш нальым. 2011 ийыште ме 20 еҥ (10 ӱдыр да 10 эрге) Москошко Щепкин лӱмеш кӱшыл театральный училищышке тунемаш кайышна», – ойла С.Александрова.
Москосо илыш вестӱрлӧ
Москошто тунемме пагытшым Светлана поро кумыл дене шарналта. Училищыште марий студент-влакым театрысе илышын ойыртемже дене келгын палдареныт, актёрын могай лийшашыжым, сценыште шкем кузе кучышашым, ты профессийын кӱлешлыкшым умылтареныт.Тыгодым нунын дене лӱмлӧ, кугу опытан педагог-влак пашам ыштеныт.
«Курснам театрын да кинон актёржо Игорь Владимирович Лях вуйлатен, тудо мемнан мастерна ыле. Тунемаш куштылго лийын огыл гынат, келшен. Ме 9 шагат эр гыч 10 шагат кас марте тунемынна. Мо шарнем, теорий шуко ыле. А урок-влакым шуко туныктышо творческий йӧн дене эртарен. Мутлан, англичан урокышто ме сценкым англичанла модынна, англичанла муренна. А философий предметым сценкым модын тунемынна.
Мӧҥгысӧ пашам шуко пуэныт. Руш, йот литературым ятыр лудынна, этюдым эре ямдыленна. Кызыт шоналтем да кузе чыла шуктымо – ӧрам веле! Тыгак тӱрлӧ театрышке коштынна. Тидын шотышто мо сайже: Москошто студент-влак шуко вере яра пурен кертыт. Мый Москосо чыла театрышке спектакльлашке, тыгак лӱмлӧ руш актёр, режиссёр-влак дене эртыше вашлиймашлашке коштынам. Москош тунемаш кайымем дене мыйын шонымашем, илыш умылымашем вашталтыныт», – ойла Светлана Александрова.
Геройжо-влак ойыртемалтыт
Ныл ий тушто тунеммеке, Светлана пырля тунемме йолташыже-влак дене М.Шкетан лӱмеш Марий драмтеатрыште пашам ышташ тӱҥалын. Светланан модмо геройжо-влак ойыртемалтше, шинчаш перныше улыт. Тудо «Салика» спектакльыште Маринамат, Саликамат, «Элнетыште» Чачим, «Илена-йӱлена» спектакльыште Илонам, «Осал чоялык да йӧратымаш» постановкышто Луизам, «Снегурочка» спектакльыште Лумӱдырым, «Тулар ден тулачеште» спектакльыште Полина Витальевнам, «Ава капиталлыште» Лизам да моло вере тӱрлӧ рольым модеш. Вашке 26-27 ноябрьыште «Торешвате» спектакльын премьерже лиеш. Тушто Светлана Александрова, ик тӱҥ рольым, Катаринам, модеш.
«Мыйын героем-влак положительый улыт. Ынде отрицательный герой-влакым модын ончынем. Ме вет тӱрлӧ рольым модаш тунемынна.
Паша оҥай, но калык ончыко лектын моштыман. Лӱдмӧ-вожылмо койыш деч утлыман. Вожылмаш пытен гынат, сценыш лекме деч ончыч ик жаплан лӱдмаш садак лиеш. Но варажым чыла тиде мондалтеш. Ик жап залышке туран ончен ом сеҥе, йӧндымын чучеш ыле. Но ты койыш деч утлен кертым. Тыгак роль гыч лектын моштыман, геройын илышыжым сценыште кодыман, а пырля наҥгайыман огыл. Мылам ты пашам келша. Тиддене мый вий-куатым налам», – ойла самырык актрисе.
Светлана чон ласкалыкым, вий-куатым пӱртӱсыштӧ налеш. Яра жапше годым книгам шергалеш, крючок дене пидеш. Пытартыш жапыште коллегыже актёр Иван Соловьев дене пырля тӱрлӧ пайремым эртарат, тамада семын тыршат.
Светлана – весела кумылан ӱдыр. Ты самырык актрисын паша лектышыже куандара, мастарлыкше ситыше. Залыште шинчыше-влакын кидсовышт, таумутышт гыч Светланан устан модмыжым умылаш лиеш. Тудын усталык пашаже умбакыжат вораҥын толжо, сеҥымашыже ятыр лийже.
