Саламлымаш

А.В.СМИРНОВ, Марий Эл Республикын Кугыжаныш Погынжын председательже:

Марий Элыште илыше пагалыме еҥ-влак! 2020 ий мучашке лишемеш. Тений ме Шарнымаш да чап идалыкым, Марий Эллан 100 ий теммым палемдышна.

Тӱрлӧ нелылык дене тӱкнаш логалын гынат, идалык оҥай, весела, у сеҥымашлан да поро паша-влаклан поян лийын.

Марий Элысе депутат корпус идалык мучко кыртмен пашам ыштен. У ийыш ме пеҥгыдемдыме бюджет дене вончена. Вес ийын Россий Конституцийыш пуртымо вашталтыш-влак дене республикысе законодательствым тӧрлаш тӱҥалына.

Эртыше идалыкым ужатен, Марий Эл Республикын Кугыжаныш Погынжо, еҥ-влакын икте-весылан полшен, ӱшанен пашам ыштымыштлан таушта.

Поснак кугу таум ойлымо шуэш 2020 ийысе герой-влаклан – медицине пашаеҥ да волонтёр-влаклан. Нуно тиде неле пагытыште кугу пашам шуктеныт.

У ий вашеш кажныже вес ийлан могай-гынат планым чоҥа, ала-мом вуча. Тек чыла шонымашда шукталтеш, а чонышто волгыдо да куан шӱлыш озалана.

Кугыжаныш Погын кажныжым шушаш пайрем дене саламла! Пеҥгыде тазалыкым, кужу ӱмырым, еш пиалым тылана.