Российын Тӱвыра министерствыже кодшо идалык мучаште 61 коллективлан федеральный кӱкшытан наградым пуымо шотышто приказым луктын.
Ты радамыш Марий Турек район Кугу Карлыган тӱвыра пӧртын «Зардон» («Ӱжара») ансамбльже логалын. Тудлан «Калык усталыкын сулло коллективше» лӱмым пуэныт. Ансамбль 1975 ий годсек куандара. Ты жапыште ятыр оҥай программе дене выступатлен. Кугу верым коллектив удмурт калыкын илыш-йӱлажлан, тӱвыражлан, фольклоржылан ойыра. Ансамбльын участникше-влак шке мастарлыкыштым ятыр сценыште ончыктеныт, Крымыште эртаралтше «Алтын Майдан» фестивальыштат лийыныт.