Мемнан тӱшкашкына марий тувырым чийыше почтальон тавалтен-муралтен пурен шогалят, ӱдыр-рвезе-влак куанен шыргыжальыч. Сöрал открыткым, журналым кидыш кучен, самырык годсо жап кажныжын ушеш возо. Тиде таче почтальон сомылым шуктышо, Провой кундем Кужмара школым 1993 ийыштеиквереш тунем лекше йолташна, «Шӱм куан» ансамбльын тале мурышо да куштышо, поро да весела Алёна Иванова.
Тений школым тунем пытарымыланна 30 ий темын. 2023 ийым Педагогын да наставникын идалыкше семын увертарыме. Ме шергакан да пагалыме туныктышына-влакым аклена, нунын дене кугешнена. Нуно илалше улыт гынат, ваш келшен, эҥертен илат. Тӱрлö проектышкат ушнат. Туныктен ойлымыштым чоныштына ашнена: «Илышыше тӱрлö лиеда: курыкыш кыртмен кӱзаш ӱнарда ситыже, шояче корным кораҥ кайыза, кинде шултышдам ида чамане, тунемза, ида öркане».
Ме кугырак ийготан тунемше-влак дене пырля Карл Маркс лӱмеш ялозанлыкыште пашаште шуаралтынна: пареҥгым погенна, ушменым луктынна, умлам кӱраш коштынна. Кеҥеж каныш жапыште ача-ава-влак дене пырля идымыште пырчын коштенна. Ава олмеш вольыкым пукшаш логалын. Кугыеҥын койыш-шоктышыжым эскеренна. Пашалан писе улмышт мыланна пример лийын. Пионер жап нергенат йолташем-влак ятыр каласкалышт. Изи гына капкылан йоча-шамыч шоҥгыеҥ-влаклан кертмышт семын полшеныт: вӱдым конденыт, пум опташ полшеныт, пöрткöргым мушкыныт, а телым корным эрыктеныт. Мучаш марте пашаштым шуктеныт. Пашадарым налын, шкаланышт пӧлекым ыштеныт, экскурсийыш тӱшкан миен коштыныт. А варажым пырля юарлен модыныт.
Эх, тыгай жап эртен манын, ида шоно да ида öкынö. У, ушан тукым кушкеш. Илен-толын, мемнан семынак тӱрлö сферыште пашам ышташ тӱҥалыт. А кызыт нуно кажне кечын уш-акылыштым пойдарат. Самырык туныктышо-влак пашаштышт у йӧным, техникым кучылтыт. Илыш дене тöр каят.
Тений Кужмара кыдалаш школ 180 ияш лӱмгечыжым пайремла.
Саламлена! Тек ончыкшымат порылык, келшымаш, аклымаш озаланат. Пайрем дене, йолташем-влак!
Людмила Эльдеева, «Изи шӱдыр» («Звёздочка») йочасадын воспитательже.
Звенигово ола.
