И.С.Палантай лӱмеш тӱвыра да сымыктыш колледж –Республикыштына профессиональный шинчымашым пуышо ик эн кугу тунемме вер. Тыште кок факультет уло: «Тӱвыра да театрально-зрелищный сымыктыш» ден «Академический музык факультет». 9 ден 11 класслам тунем пытарыше ӱдыр-рвезе-влаклан очно тунемаш 10 специальность темлалтеш. Тылеч посна колледж пеленсе йоча-влаклан сымыктыш школышто 260 наре йоча мураш, кушташ, тӱрлӧ семӱзгар дене шокташ тунемеш.
Тӱвыра да сымыктыш колледжын тачысе илышыж нерген ме тудын директоржо Алексей Паскичев дене мутланышна.
– Приёмный комиссийна шке пашажым тӱҥалын. Тунемше-влак 20 июнь гыч 14 июль марте специальностьым ойырен, йодмашым возен кертыт. Тыштак тунемаш пурымо шотышто лекше чыла йодыш-влакым рашемдаш полшат.
Тений республикысе школла дене кылнам саемдыме, йоча-влакым мемнан деке тунемаш кумылаҥдыме шотышто ятыр пашам шуктымо. Туныктышо ден студент-влак тӱрлӧ школлаш лектын коштыныт, мастер-класс-влакым эртареныт. Ты сомылым ончыкыжым эшеат саемдаш шонена.
Тений шыжым академический музык факультет пелен «Музыкальный театрын актёржо» специальность почылтеш. Тыште ме опер да балет театрлан мурышо актёр-влакым ямдылаш тӱҥалына, – каласкалыш Алексей Анатольевич.
Профессиональный шинчымашым налаш колледжыште 3 ий да 10 тылзе тунемман. Студент-влак конкурслаште, фестивальлаште участвоватлат, концертыште выступатлат. Шукерте огыл тысе «Жар-птица» хор «Вечные истоки» Всероссийский конкурсышто лауреат лӱмым налын, тыгак «Чинчывий» кӱсле ансамбль ден семӱзгар дене шоктышо «Памашшинча» ансамбль Моско воктенысе Красногорск олаште эртаралтше конкурсышто сеҥышыш лектын.
Тунем пытарыме деч вара дипломан специалист-влак пашаш кушко пурен кертыт? Республикыштына кажнылан келшыше паша вер сита мо? Тидын шотышто Алексей Анатольевич тыгерак мане:
– Пашаш пураш йӧн кажнын уло. Тидлан эн ончычак сайын тунемаш тыршыман. Ме выпускник-влаклан паша верым муаш полшена. Тидлан профориентационный сомылым шуктышо методист-влак улыт. Тений республикысе паша верым темлыше чыла вуйлатыше-влак дене вашкылым ыштыме нерген догорым подписатленна. Студент-влак кушто могай специалист кӱлмым ончылгоч палат. Кажне выпускникын резюмежым колледжын сайтыштыже вераҥденна, паша верым темлыше-влак шкаланышт специалистым шке ойырен кертыт. Тунемме жапыште, практике годым студент-влак нунын дене пашам ыштен ончен кертыт. Тылеч посна студент-влаклан квалификационный экзаменым эртарена. Тышке работодатель-влак толыт, ӱдыр-рвезе-влак дене палыме лийыт, паша шотышто мутланат, каҥашат. Морко, Оршанке, Килемар районласе тӱвыра пӧлка-влак гыч да Угарман кундем Саров ола гыч толыныт ыле. Паша уло, студент-влакын кумылышт гына лийже.
Республикыштына тӱвыра пӧртлаште, каныме рӱдерлаште, сымыктыш школлаште сай специалист-влак кӱлыт. Районлаштат, олаштат. Колледжыште тений Э.Сапаев лӱмеш опер да балет театрыш пашаш пураш йӧным ыштыше «Музыкальный театрын актёржо» специальность почылтын гын, 2020-2021-ше тунемме ийлан «Марий Эл» калык ансамбльлан куштызо-влакым ямдылаш манын, «Куштышо ансамбльын артистше» специальностьым почаш шонат. Тыгак Алексей Анатольевич колледж пеленысе сымыктыш школышто театральный отделенийым почаш кӱлмӧ нергенат ойлыш.
– Театральный отделенийыште йоча-влакым Константинов лӱмеш руш драме театрын актёржо-влак ден режиссёржо туныкташ тӱҥалыт. Тыгай отделений колледжыште шукертсек уло, но школ лийын огыл. Йоча-влаклан тышке тунемаш пураш ончылгоч ямдылалташ йӧн лийшаш. Музыкант ден куштышо-влак шотышто ме Национальный президентский школ-интернат да Бауман лӱмеш лицей дене кылым эре кучен шогена.
Ыштышаш паша шуко. Кугу театральный концертный залнам уэмдыме, ончыкыжым колледжысе материально-технический базым уэмдаш тӱҥалына, семӱзгар-влакым налына, полатнам ачалкалена. Тидым ышташ кугыжаныш могырым латкок миллион теҥге окса ойыралтын, – мане Алексей Анатольевич .
Алексей Паскичев Волжск олаште шочын, Медведево район Шойбулак ялыште кушкын. Профессиональный шинчымашым шкежат И.С.Палантай лӱмеш колледжыште (тунам – И.С.Палантай лӱмеш музыкальный училище) налын. Озаҥ оласе консерваторийыште «Зуковой инструмент-влак: кларнет» специальность дене тунемын. Икмыняр жап ты консерваторийыште, вара Руэмысе школышто туныктен. 2004 ий годсек Медведево посёлкысо Н.Смирнов лӱмеш сымыктыш школышто директор лийын. Вуйлатыме пашаште ончыктымо мастарлыкшым ужын, 2018 ийыште Алексей Анатольевичым И.С.Палантай лӱмеш тӱвыра да сымыктыш колледжын директоржылан шогалтеныт.