Почеламутым але прозым сылнын лудын мошташ, калыкын чонжым тарваташ – кугу талант. Южо еҥлан тыгай мастарлык шочмекак пуалтеш. Козьмодемьянск оласе лицейыште 10-шо классым тунем пытарыше Полина Каткова тений сылнын лудмо «Живая классика» тӱнямбал конкурсын республикысе йыжыҥыштыже сеҥышыш лектын. Майыште тудо «Артек» тӱнямбал йоча рӱдерыште канен да тушто Российысе йыжыҥыште шкем терген.
Марий Элыште – кум сеҥыше
Конкурсын республикысе йыжыҥыштыже кум тунемше призёр лӱмым сулен. Тушеч кокытшо Козьмодемьянск лицей гыч лийыныт. Полина дене пырля эше 6-шо «Б» классыште тунемше Ульяна Галибина сеҥыше радамыш лектын.
Полинан усталыкшым, сылнын лудын моштымыжым икмыняр йыжыҥыште кӱкшын акленыт. «Артекыш» мийымыжым Полина илышыштыже ик эн кугу сеҥымаш семын ужеш. Тудын мутшо почеш, Российысе йыжыҥыште элнан тӱрлӧ кундемже гыч 250 наре лудшо погынен улмаш. Эше 32 элла гыч виян участник-влак толыныт. Полина 16-17 ияш-влак коклаште таҥасен.
«Артекыште» ӱдыр 21 кече канен, шукылан тунемын.
– Конкурсыш руш йылмым да литературым туныктышо Надежда Геннадьевна Токмалаева ушнаш темлен. Мый Виктор Астафьевын «Бабушкин праздник» произведенийжын ик ужашыжым лудынам. Тидлан туныктышо дене пырля, тыгак шке семын шуко ямдылалташ пернен.
«Артекыште» мый теҥыз отрядыш логалынам. Ныл гана теҥызыш лектынна, тӱрлӧ зачётым сдатленна, Морзе азбуко дене палыме лийынна да молымат тунемынна. Тыгак Шем теҥызысе флотышто корабль-влакым онченна, шымленна. Экскурсий дене Симферополь, Севастополь олалашке миен коштынна.
«Артекыште» мыланем чот келшен. Вер пеш мотор. Теҥызше канде-канде тӱс дене волгалтеш. Тыште мый шуко йолташым муынам.
Российысе йыжыҥыштат шкем сайын ончыктенам, но финал марте шуын омыл. Мыланем шӧртньӧ медальым, дипломым кучыктеныт, тыгак «Литрес» журналлан подпискым ыштен пуэныт, – мане П.Каткова.
Моло деч ойыртемалтше
Козьмодемьянск олаште шочын-кушшо ӱдыр 1-ше класс гычак ты лицейыште тунемеш. Усталыкше, чолгалыкше дене Полина изинек моло деч ойыртемалтын. Мураш йӧратен, почеламутым сылнын лудын, тыгодым театральный кружокыш коштын.
Козьмодемьянск оласе Я.Эшпай лӱмеш сымыктыш школым «вокальное искусство» направлений дене тунем пытарен. Республикысе, регион-влак кокласе тӱрлӧ вокал конкурсышто шкем терген да шуко гана ончыл верлаш лектын. Нунын кокла гыч «Калейдоскоп талантов», «Шанс», «Территория детства», «Золотая осень», «Звездный олимп» да молымат палемдаш лиеш.
П.Каткова сценым изинек йӧратен. Сандене тӱҥалтыш классла гыч вӱдышӧ семын тыршаш тӱҥалын. Таче тудо лицейыште, тыгак Козьмодемьянск олаште тӱрлӧ мероприятийым, пайремым вӱда.
Ӱдыр волонтёр семынат тырша. Российысе йоча да молодёжь-влакын толкынын (РДДМ) Козьмодемьянскысе штабышкыже коштеш. Тушто инвалид икшыве-влаклан тӱрлӧ мероприятийым, У ий ёлкым эртарат да моло пашам шуктат.
«Визытанлан» гына
Полина шуко вере шуаш тырша, тыгодым «визытанлан» гына тунемеш.
– Южгунам чыла шукташ неле. Но мый жапым моштен шонен кучылтам. Мыланем эн чот физике, руш йылме да литератур предмет-влак келшат. Физике – точный науко, оҥай предмет. Мый тӱҥ кугыжаныш экзаменымат (ОГЭ) ты предмет дене кученам. Школ деч вара технический направлений дене тунемаш каяш шонем. Варажым эше театральный шинчымашым налнем. Фильмлаште модаш кумылем уло, – каласыш П.Каткова.
Кызыт кеҥеж каныш. Полина коча-коваж деке ялышке миен коштеш, полышкала, йолташыже-влак дене вашлиеш, тыгак еш дене пырля тӱрлӧ олам ончен кошташ йӧрата. Книгамат лудаш огеш мондо.