2024 ий сентябрьыште Марий Элыште кугу событий эрта — кундемысе ден муниципальный черетан сайлымаш. Марий Элысе общественный палатын членже Лариса Овчинникова сентябрьыште лийше сайлымашын ойыртемже-влак нерген каласкален.
2024 ийыште йӱклымӧ кече 8 сентябрьлан логалеш. Туге гынат ынде икмыняр ий тудо кум кечаш форматыш савырнен. Мемнан республикыште моло регионысо семынак сайлымаш 6 сентябрь гыч 8 сентябрь марте эрташ тӱҥалеш. Кум кечаш йӱклымӧ практике шкежым йӧнан семын ончыктен.
- Сайлыме процесслан ямдылалтмаш уже кая. Тыге 24 июнь гыч 24 июль марте Марий Эл Республикын сайлыме комиссийышкыже кандашымше созыв Кугыжаныш погынын депутатше-влакым сайлымаште участвоватлаш кандидат-влакым ойырымаш да регистрироватлымаш кая.