Кияр нӧшмӧ писын шытыже манын, тудым шокшо вӱдыштӧ кок шагат наре кучыман. Тылеч вара шинчалан вӱдыш пыштен ойырыман. Кӱшкӧ кӱзышӧ нӧшмӧ-влакым вигак кудалтыман. Кодшо нӧшмым ару вӱд дене шӱалтыман да марганцовко вартышыште изиш кучыман. Кияр озымым йыраҥыш шындыме годым лакыш почкалтышым пышташ гын, сай. Тудо шокшым пуа, а кияр шокшым йӧрата. Тыгак почкалтыш киярлан шкешотан ӱяҥдыш лиеш.