19-26 февральыште Морко район Кужер школышто Физкультур арня эртаалтын. Тыгодым тунемше-влак ече дене ӱчашеныт, «Зарница» военно-спортивный модышышто лийыныт. Тыгак физультурым туныктышо Ю.Д.Николаев «Весела стартым» эртарен.
Юрий Николаев Морко район Эҥерсола ялыште шочын-кушкын, Оршанке педучилище деч вара шочмо районышкыжак толын. Тудын тунемшыже-влак Российысе таҥасымашлаштат ятыр сеҥымашыш шуыныт. 2008 ийыште туныктышылан «Российын эн сай тренерже» почётан лӱмым пуэныт. Тыгак 2013 ий годсек – общий образованийын почётан пашаеҥже.
Юрий Дмитриевич эн ончыч Морко посёлкысо 2-шо номеран школышто физкультурым туныктен. Ятыр жап Октябрьский посёлкысо школ-интернатыште тыршен. Ойыртемалтше икшыве-шамычым спортлан кумылаҥден веле огыл, нуным районысо, республикысе да Российысе таҥасымаш-влаклан ямдылен. 2019 ийыште школ-интернатысе ӱдыр-рвезе-влак Октябрьский кыдалаш школышто тунемаш тӱҥалыныт. Тунам Юрий Дмитриевич ты школыш кокымшо гана толын. Тулыкеш да ача-ава попечений деч посна кодшо йоча-шамычлан мини-футбол, ӱстембал теннис, бадминтон, волейбол, баскетбол дене кружок-влакым вӱден. Уста тренер дене шуаралтше тунемше-влак Российысе специальный олимпиадыште вийыштым тергеныт. Тыгай пашам Юрий Дмитриевич 2006 ий годсек ворандарен.
Физкультурым туныктышо шкежат спортышто ойыртемалтшаш. Ю.Николаев куштылго атлетикым йӧрата, а волейбол да гимнастике дене 3-шо разрядше уло.
Тений педагог Кужер школышто туныкташ тӱҥалын. Шукерте огыл йоча-влакым 23 февраль вашеш да Муканай ялыште шочын-кушшо погранвойскан старшинаже Ирина Николаевна Петрова лӱмеш Шлань ялыште эртаралтше ече дене таҥасымашышке намиен. Тушто тудын тунемшыже Даниил Филиппов кумшо верым налын.
А 28 февральыште Ю.Д.Николаев районышто физический культур дене туныктышо-влакын семинарыштышт внеклассный пашам шуктымыж шотышто докладым лудын, уроклаште тазалыклан кӱлешан технологийым кучылтмо нерген каласкален. Тыгак Морко посёлкысо 6-шо номеран школышто открытый урокым ончыктен.
Эльвира Терентьева.
Фото-влакым школ архив гыч налме.