Морко кундемыште школ пӧрдем гычак тунемше-влакым шочмо йылмылан шӱмаҥдыме шотышто паша кӱлынак воранен шога. 24 декабрьыште районышто этнокультур предметла дене олимпиаде эртаралте. Шочмо йылме да сылнымут, кугыжаныш марий йылме да ИКН, татар йылме ден сылнымут предметла дене тӱвыргӧ паша лектышым палемдыманак. Ты гана олимпиадыште 79 тунемше шке вийжым терген. Тышечын 17 йоча сеҥымаш дене шке туныктышыжым куандарен, 12 тунемше призёр лийын.
ИКН предмет дене 9-ше класс коклаште Кокласола лицейын тунемшыже Виктория Декина 1-ше вер дене палемдалтын, 10-шо класс коклаште – Унчо школын тунемшыже Анастасия Сидорова, 11-ше класс коклаште – Морко 1-ше школ гыч Марина Сергеева.
Шочмо марий йылме дене олимпиадыш 8-ше класс гычак ушненыт: 1-ше верым Шӱргыял школын тунемшыже Виктория Александрова налын, 9-ше класс коклаште Кокласола лицейын тунемшыже Татьяна Тимофеева, 10-шо класс радамыште – Унчо школ гыч Светлана Челкаева, 11-ше классыште – Унчо школын чолга ӱдыржӧ Надежда Тихонова.
Марий сылнымут предмет дене Эҥерсола школын тунемшыже Иван Фёдоров (8-ше класс), Шӱргыял школын тунемшыже Геннадий Скворцов (9-ше класс), Унчо школын тунемшыже-влак Александр Петров ден Екатерина Ильина (10-шо, 11-ше классла) чылам ончылтеныт.
Кугыжаныш марий йылме дене Морко 2-шо школ гыч Виктория Павлова (9-ше класс), кажне ийын районышто веле огыл, а регион кӱкшытыштат сеҥышыш лекше, Морко 1-ше школын чолга тунемшыже Анна Алексеева (10-шо класс), Морко 1-ше школ гыч Екатерина Сергеева (11-ше класс) 1-ше верыш лектыныт.
Ий гыч ийыш татар йылме денат олимпиадыште икшыве-влак пеш сай лектышым ончыктат. Теве Кульбаш школын тунемшыже-влак Замира Губашова (8 класс) ден Дания Файзуллина (9 класс) 1-ше вер дене палемдалтыныт. А Нурӱмбал школ гыч Ильдар Фалзянов (9 класс) ден Ильшат Хабибрахманов (10 класс) татар сылнымут дене сеҥыше лийыныт.
Этнокультур предметла дене районышто эртаралтше олимпиадын паша саскаже чоным куандара. Сеҥыше да призёр радамыш логалше чыла икшыве-влакым ты олимпиадылан ямдылыше туныктышо-влаклан кугу чап. Районышто сеҥыше йоча-влак ынде республикыште шке вийыштым тергаш тӱҥалыт.
Е.В.Григорьева, Морко районысо этнокультур предметлам туныктышо-влакын методушем вуйлатышышт.
Снимкыште: Михайлова Анастасия марий литератур дене призёр лийын. Александрова Виктория марий йылме дене сеҥышыш лектын.
Скворцов Геннадий (покшелне шинча) марий литератур дене сеҥыше лийын.