11 мартыште Марий Элым Вуйлатыше Ю.Зайцев У Торъял районысо «Первый Май» озанлыкыште лийын. Лач тыште шӧрым лӱштымӧ шотышто инвестиционный проект почеш пашам ыштат.
Марий Элыште 290 млн теҥгеаш инвестпроектым илышыш шыҥдарыме.
Предприятий 2020-2021 ийлаште 504 ушкаллан комплексым чоҥен. Тушто шӧр лӱштымӧ блок уло, ушкалым йолыштыде шогыкташ лиеш.
Тыгаяк вес комплексым 2022 ийыште чоҥаш тӱҥалме. Проект почеш чумыр инвестиций 291 млн теҥгешке шуын. 2024 ийыште шӧр лӱштыш проект почеш 22,6 тӱжем тонн лийшаш.
2023 ийыште предприятийлан республикым социально-экономически вияҥдыме программе почеш 13,2 млн теҥгеаш кугыжаныш полышым пуымо. Туддене техникым да оборудованийым налме.
«Первый Май» кундемыштына ик кугу озанлыклан шотлалтеш. Тудо республикысе системообразующий организаций-влак радамыш пурталтын.
2023 ийыште компаний 82 ялозанлык технике ден оборудованийым (154 млн теҥгеаш) налын. Ялозанлык производствым шукташ 63 млн теҥге кугыжаныш полыш пуалтын.
Э.Терентьева.
Д.Речкин / Марий Элым Вуйлатышын пресс-службыжо.