Сай сату

Йошкар-Олаште тачысе кечылан 130 утла IT-компаний пашам ышта. Садлан тудым Российын ик эн виян IT-олажлан шотлаш лиеш. 2023 ийыште компаний-влак куд миллиард утла теҥгем ыштен налыныт.

Москошто эртаралтше «Россий» тӱнямбал выставке-форумышто Марий Элыште IT паша вораҥме нерген iSpring, TravelLine, «Цифровые технологии» компаний-влак палдарат. Нунын пашаштым Марий Элысе Правительстве Председательын алмаштышыже Д.Троицкий палемден. Тудо кундемыштына ыштыме IT-сату элыштына веле огыл, тӱнямбалнат йодмашан манын. Кундемыштына ты отрасльым вияҥдыше специалист-шамычат ситышын улыт. Сандене республикна ты сомылым вораҥдараш моло регион-влакланат полшаш ямде манын Д.Троицкий. Тыгак тудын мутшо почеш, информационный технологийым вияҥдыше организаций-влаклан регион кӱкшытыштӧ правительстве могырым полыш ышталтеш. Тыге, мутлан, IT- компаний-влаклан налогым тӱлаш льготым келыштарыме, кугыжаныш погым арендыш налмылан оксам кок пачаш шагал тӱлаш палемдыме.

Интернет гыч налме фото.