25 июньышто Йошкар-Ола администрацийыште медалист-влакын балышт лийын. Тений олаште 118 выпускник «За особые успехи в учении» медальым сулен. Нунын коклаште – марий ӱдыр Анна Александрова.Аня 27-ше №-ан школым тунем пытарен. Тудо изинек творчествылан шӱман кушкын. Шкеж нерген каласкала: «Кокымшо классыште тунемме годым «Акварелька» кружокыш коштынам. Тудым ИЗО-м туныктышо Елена Юрьевна Дубова эртарен ыле. Сӱретлаш, кагаз дене оригами пашам ыштылаш моткоч йӧратем. Сӱретлыме, тӱрлӧ плакатым, кидпашам ыштыме годым чонем кана, тӱрлӧ арверым, пӱртӱсым вес семын – моторракым – ужам. Адакшым сӱретлыме годым кид лывыргырак лиеш. 2-шо классыштак Йоча да самырык тукым творчестве полат пеленысе «COME IN» йоча усталык объединенийыш англичан йылмым тунемаш кошташ тӱҥалынам. Школ кокымшо пӧрт лийын гын, Йоча да самырык тукым творчестве полат мылам кумшо. Илышыштем лийше ятыр событий лачак школышто да полатыште эртеныт. Изиракем годым мый вожылшо, тыматле койыш-шоктышан лийынам. Но тышке кошташ тӱҥалме дене мый сай могырыш вашталтынам, личностьыш савырненам. Туныктышем Елена Ивановна Логинова тидын шотышто шукылан туныктен, вожатый пашалан кумылаҥден».
Икымше туныктышо кажне выпускниклан ава гай, тыршен тунеммылан мокталта, вӱчкалта, йолагай але осал койышлан пеҥгыдынрак ойла. Туге гынат кажне еҥ икымше туныктышыжым поро шомак дене шарналта. «Икымше туныктышем Екатерина Валерьевна Кудрявцева – шке пашажым сайын ыштен моштышо кугу профессионал. Тудо тунемшыже-влакын мастарлыкыштым почын пуаш, вияҥдаш полшен, мыланна сай шинчымашым пуэн. 5-11-ше класслаште тудын нерген иканат монден омыл. Кажне шочмо кечыж дене, тӱрлӧ пайрем дене саламленам. Тудлан эре таум ойлем», — манеш Анна.
А.Александрова неле-йӧсӧ годым вуйым огеш саке, кеч-могай чаракым, нелылыкым сеҥен лекташ вийым муман манын ойла. Тидым ӱдыр изинек умылен кушкын. Аня азаак ача деч посна кодын. Аваж ден коваже шӱм падырашыштлан уло йӧратымашыштым, чон шокшыштым пуэныт, чын воспитатленыт. «Авам ден ковам мылам эн кугу эҥертыш улыт. Неле годым лачак нунын шомакышт вийым пуат. Изинекак мыйым самостоятельный лияш туныктеныт. Йоча да самырык тукым творчестве полатыш англичан йылме дене занятийлаш троллейбус але маршрутко дене шкет коштынам, авам ден ковам тыгодым пашам ыштеныт. Школышкат шкетын ошкылынам. Урокымат шке ыштенам. Иктаж-мом умылен омыл гын, кастене ковам паша гыч толеш да полша ыле. Физикым, математикым, информатикым куштылгынрак умылем гын, гуманитарный предмет-влакым, поснак обществознаний ден историйым, утларак тыршен тунемынам», – каласкала выпускнице.
Анян тыршен тунеммыже лектышым пуэн. Тудо математике да руш йылме дене ЕГЭ-ште кугу баллым налын. Ӱдыр ойла: «Тылеч посна обществознаний дене экзаменым кученам. А тушто шуко баллым погем манын ӱшанен омыл. Тений, сайын тунеммылан шӧртньӧ медальым налаш манын, обязательный предмет-влак дене ЕГЭ результат 70 балл деч шукырак лийшаш. Мылам пробный экзамен-влакым кучымо годым 1-2 балл ситен огыл ыле. Но мый уло вием погенам, чыла правил-влакым ушештаренам да ЕГЭ-м сайын сдатлен кертынам. Ынде Марий кугыжаныш университетыш тӱҥалтыш класслам да информатикым але физикым да математикым туныктышылан тунемаш пураш ямдылалтам. Ковамын корным такырташ шонем. Ончыч вес олаш каяш шоненам ыле, вара лишыл еҥем, родем, йолташем-влак деч посна тораште лийын ом керт манын умыленам.
Мый йоча-влак дене пашам ышташ йӧратем. 2014 ийыште «Радужный» лагерьыште вожатыйын полышкалышыже лийынам. А вара йоча да самырык тукым творчестве полат пелен вожатый-влакын курсыштым эртенам да вес ийын тиде лагерьыште вожатый пашам шуктенам. Йоча-влак ушан, шкешотан улыт. Нунын дене жапым эртарен вийым налам, творчествылан кумылаҥам. Адакшым профессийым чонлан келшышым ойырен налман манын шонем, садланак туныктышо лийнем».