Тений 1 сентябрьыште Марий Элыште 87,5 тӱжем наре ӱдыр-рвезе парт коклаш шинчеш. Нунын кокла гыч икымше классыш 9400 йоча кая. Ӱмашсе дене таҥастарымаште тений школьник-влак шукемыныт, 2022 ийыште 85 тӱжем наре икшыве школыш каен.
Тений республикыштына 251 туныктымо тӧнеж пашам ышта. 218 школышто йоча-влак ик смене дене тунемаш тӱҥалыт, а 33 тӧнежыште кок смене дене туныктат.
У тунемме ий вашеш 28 августышто Йошкар-Оласе ОПЦ-ште «Собери ребёнка в школу» акций эртаралтын.
Тудым «Единый Россий» партийын Йошкар-Оласе пӧлкажын еҥже-влак кажне ийын ямдылат. Ӱдыр-рвезе-влаклан пӧлекым «Йошкар-Ола» ола округым вуйлатыше В.М.Кузнецов, Йошкар-Оласе депутат-влак погынын еҥже-влак кучыктеныт. Шуко шочшан, начарын илыше ешлаште кушшо 80 икшывылан школлан кӱлешан канцеляр сатум, ранецым кучыктеныт.
– Шуко шочшан еш-влак ончылно шогаш да икшыве-влаклан пӧлекым кучыкташ поснак куанле. Таче пӧлеклыме рюкзак сай отметке, шуко шинчымаш дене темеш гын, тунемшын ончыкылык корныжо утларак волгыдо да кумда лиеш манын ӱшанем, – ойлен В.М.Кузнецов.
Школыш – у рюкзак дене
Рюкзакым Кира Афанасьеваланат кучыктеныт. Ӱдыр 24-ше номеран школыш коштеш, кокымшо классыш вончен. Тудо аваже, 4-ше классыш кайыше Костя изаже да изи Петя шольыж дене толын.
– Акцийыш ушнаш Киран туныктышыжо темлен. Кира тыршен тунемеш, Костя кумшо классым «нылытан» да «визытан» отметке-влак дене тунем пытарен. Ты акцийым кӱлешанлан шотлем. Вет шуко шочшан ешыште школлан ямдылалташ поснак шуко окса кая, а акций тидын шотышто изирак полышым пуа, – манеш йоча-влакын авашт Алёна Афанасьева.
Авторын фотожо-влак.