Марий Элым Вуйлатыше Юрий Зайцев приёмым эртарен.
Тушто Волжский ден Марий Турек районлаште илыше-влак Чодыраял – Усола Корамас ден Кугу Карлыган – Изи Карлыган корнылам олмыкташ йодыныт.
Транспорт да корно озанлык министр Александр Герасименко умылтарен: чынжымак, нине участкылаште корным ачалыман. «Инфраструктура для жизни» нацпроект почеш, тушто пашам ышташ палемдыме, тудым 2026 ий сентябрь мучаш марте олмыктышаш улыт.
Юрино гыч Елена Бабровская «Теремок» йочасадым ачалыме нерген йодын. Тудлан Марий Элысе образований да науко министрын алмаштышыже Валентина Гаврилова вашештен. Йочасадым 2026 ийыште «Семья» нацпроект почеш олмыктат, тидлан тӱрлӧ бюджет гыч 63 млн наре теҥге ойыралтшаш манын. Ты окса дене кӧргӧ пӧлемлам уэмдат, тошкалтышым, йочасадыш пурымо-лекме верым ачалат, инженерный коммуникацийым вашталтат. Субсидий дене модышым, мебельым да пищеблоклан оборудованийым налыт.
Йошкар-Ола гыч Нина Васина инсулинлан рецептым налме йодышым нӧлталын. Тидлан кажне тылзын эмлымверыш коштман, тидыже моткоч йӧнан огыл манын.
Тазалыкым аралыме министр Владимир Гладнев умылтарен: ведомствышто икмыняр эмым налаш лийше выпискым пуышо электрон спискым ямдылыме, кызыт ты пунчалым республикысе прокуратурыш колтымо. Тушто тиддене келшат гын, кӱлешан документ черлыеҥын Госуслуги порталышкыже вераҥдалтеш да тудым аптекыште ончыкташ лиеш. Ты проектым тений 1 июнь гыч шыҥдараш палемдалтын.
Килемар районышто илыше-влак Сеҥымаш памятник воктенысе кумдыкым видеокамерым вераҥдаш кӱлмӧ нерген йодыныт. Тидын шотышто «Россети Центр и Приволжье» ПАО полшаш лийын.