Садлаште яра кийыше участке-влак улыт, южгунамже нуно нигӧн ӱмбак оформитлыме огытыл. Мый ик тыгай участкым налнем. Сад товариществын членже-влак тӱшка погынымаште тудым вес еҥлан пуаш кутырен келшен кертыт мо?
Татьяна.
Йошкар-Ола.
Росреестрын Марий Элысе управленийжын кугыжаныш мланде надзор пӧлкажым вуйлатыше Юрий Касьянов вашешта:
– Садысе мланде участке кугыжанышын але районын собственностьшылан шотлалтеш да тудлан вес еҥын праваже уке гын, кумылан еҥ тудым РФ Мланде кодексыште пеҥгыдемдыме радам почеш налын кертеш. Тыгай мланде участкым кугыжаныш кучемын исполнительный органже але верысе самоуправлений орган РФ Мланде кодексын 9-11-ше статьялаштыже ончыктымо радам почеш пуа. А садоводческий товариществын членже-влакын тӱшка погынымаштышт мланде участкым вес еҥлан пуымо шотышто решенийым лукташ правашт уке.