26 мартыште Марий Элыште эртарышаш ХХIV Федеральный Сабантуйым ямдылыме да эртарыме шотышто оргкомитетын заседанийже лийын.
Тушко Татарстанысе премьер-министрын алмаштышыже, Татар-влакын тӱнямбал конгрессыштын Национальный советшым вуйлатыше В.Шайхразиев толын.
Тӱҥ мероприятий-влак Медведево ипподромышто 5-6 июльышто эртаралтыт. Тушко элнан 72 кундемже гыч 500 утла делегат толшаш.
«Татар-влакын йӧратыме тиде пайремышт кажне ийын ятыр еҥым чумыра. Тушко ме шкенан иза-шольо ден пошкудына-влакым унала вучена. Тидыже мыланна пеш кугу чап да ответственность. Республикыште лийшаш Россий кӱкшытан Сабантуй моло кундемыште эртарыме пайрем коклаште посна верым налже манын шонена», – каласен Марий Элым Вуйлатыше Ю.Зайцев.
Кызыт Медведево ипподромым уэмдыме, мероприятий планым ыштыме. Тушто сылнымут-сылнысем, театрализоватлыме, каныме да модмо, ужалыме площадкылам ямдылат. Имне дене кудалыштме, куреш дене кучедалме, кирам нӧлтымӧ, армрестлинг ден мас-рестлинг спорт таҥасымаш-влакым пурташ палемдыме. Тыгак йӱлам сӧралын ончыктат, оҥай программым темлат.