Ӱмаште декабрьыште Пошкырт кундемыш «Чолман» газетын пайремышкыже миенна ыле. Тунамак Нефтекамск оласе ик тӱвыра полатын фойештыже сӱрет выставкым ончышым. Кажне сӱрет могай-гынат кумылым шочыкта, шонымаш ала-кушко торашке наҥгая. Эсогыл изи ойлымашат шочеш. Шонымашем кӱрлын, выставкын авторжым шинчам дене кычалаш пижым. Ӧрдыжтӧ икмарда капкылан, изиш аптыраныше рвезым ужым. Тиде – Роман Ислаев.
Роман Калтаса район Келтей селаште шочын. Кызыт Нефтекамск олаште ила да пашам ышта.
— Роман, сӱретлаш кунам тӱҥалынат? Мо тидлан таратен?
— Изиэм годымак сӱретлаш тӱҥалынам. Тиде – авамын суапше. Тудо мыланем икмыняр сӱретым ончыктен, пырля сӱретленна. Вара шкеат тиде пашалан эркын тунемынам.
Нефтекамск оласе художественный школышто вич ий тунемынам. Тушто тунеммем мыланем кугун полшен. Исскуствын историйжым мыняр-гынат, живописьыште тӱсым, ӱмылым кучылтмо шотышто пален налынам. Айдемын капшым, чурийжым сӱретлаш тунемынам. Тидлан туныктышем-влаклан тауштем.
2004 ийыште Уфашке сервис институт пеленсе «Истоки» частный колледжыш тунемаш пурен. Тушто «Дизайнер интерьера и бытовых помещений» специальностьым налынам. А вара армийыш каенам. Кӱртньыгорно войскаш логалынам. Туштат яра жап лийме годым «Колючка» армейский пырдыжгазетым луктынам, боевой кагаз-влакым ямдыленам.
— Армий деч вара тиде пашам кудалтен отыл? Умбакыжат сӱретлаш кумыл лектын?
— Службо деч вара яра жапем шукырак лийын. Тунам вынереш ӱян чия дене сӱретлаш кумылаҥынам. Тыгай технике дене сӱретлаш художественный школышто туныктен огытыл. Шке гыч тунемаш логалын.
Мӧҥгыштем чапланыше живописец-влакын книгашт улыт. А эн йӧратыме авторем – Иван Иванович Шишкин. Тудын «Рожь», «Утро в сосновом бору», «Полдень в окресностях Москвы» да моло пашажым, Европысо сӱретче-влакын пашаштым ончен сӱретленам. Но шке гычат сӱретлымем шуын. Шочмо верем, пӱртӱс кумылаҥденыт. Тидлан мый пӱртӱс лоҥгаш лектын коштынам. Фотом ыштенам. Мӧҥгӧ толмек, картинке-влак почеш сӱретленам. Композиций моторрак лийже манын, южгунам кок фотом иквереш ушаш логалын.
— Тугеже тиде – тыйын эре ыштыме пашат?
— Уке, мый чоҥымо материалым ужалыше кевытыште пашам ыштем. Тидыже нигузеат сӱрет дене кылдалтын огыл. Сӱретым чон йодмо почеш ыштылам.
— Пашат-влакым еҥ коклаш луктат?
— Икымше выставкем 2017 ий ноябрьыште лийын. Тунам Нефтекамск оласе сӱретче-влак дене пырля «Ночь искусств» мероприятийыште участвоватленам.Чылаже куд выставкыште лийынам. Тышеч кокытшо посна ыле.
— А кушто сӱретлет? Посна мастерскоет уло мо?
-Уке, мӧҥгыштӧ веле. Чыла вере – сӱрет-влак. Южгунам тоштерыште илымемла чучеш.
— Пашадам налше-влак улыт? Але заказым ыштат?
— Палымем-влак йодын толедат. Моло йодшо-влакат лийыт, шонем.
Кунам айдеме йӧратыме пашам ышта, тидын нерген каласкалымыж годым шинчаже йӱла. Мыят Романын шинчаштыже тиде сескемым ужым. Тек рвезын пашаже тӱвыргӧ лектышан лиеш!