7-14 июльышто Сӱрем арня палемдалтеш.
Ожно марий-влак, шешке шудым солаш полшаш тӱҥалеш манын шонен, сӱаным Сӱрем деч вара ыштеныт. Тунам ты пайрем деч ончыч шудым солен огытыл. Ондак Сӱремым кум кече пайремленыт – кеҥежым шудым ыштыме деч ончыч.
Морко район Унчо велне «Шовырым кудалтыме» йӱлам шуктеныт. Оръеҥын шудым солымо годым кудаш пыштыме шовыржым ломбышко кудалтеныт. Тушеч налын пуышылан оръеҥ пӧлекым ыштен.
Сӱрем кумалтыш – пеш кӱлешан йӱла радам. Кажне ийын тудо 12 июльышто Морко районысо Унчо села воктенысе отышто лиеш. Тушко тиде кундемыште илыше да республикысе тӱрлӧ районла гыч Пӱртӱс Юмылан ӱшаныше-влак погынат. Тыгак Унчо велын йӱла ойыртемже дене палыме лияш йотэл гычат шукын толын каеныт.
Тылеч посна Сӱрем кумалтыш-влак Волжский районышто, Киров кундемысе Малмыж районышто эртаралтыт.