Пӧртыштӧ У ий шӱлышым пурташ манын, мотор лумпырчым пидаш лиеш.
Кӱлыт: «Роза» але «Снежинка», але кеч-могай тӱсан вичкыж шӱртӧ, 1,5 мм кугытан крючок. Схемым ончен пидса.
Лумпырче пеҥгыде лийже, ынже кадыргыл манын, пидын пытарымеке, тудым крахмал вӱдыштӧ кучыман. 1 кугу совла крахмалым 2 кугу совла йӱштӧ вӱдыштӧ лугыман. Каструльышко 1 стакан вӱдым темыман да тудым тулыш шындыман. Шолаш пурымеке, тушко ончылгоч ямдылыме крахмалым эркын ешарыман да лугыман. Вартыш нугыдо лийшаш.
Изиш йӱкшымеке, лумпырче-влакым крахмал вӱдыштӧ 5 минут кучыман. Пунчалман да пенопластышке але иктаж пушкыдо материалышке йӱдлан кошкаш пыштыман. Тыгодым кажне тӱржым английский булавке дене шуркаледыл кайыман. Эрлашыжым чыла тидым кораҥдыман.