Тиде историйым Таня йолташ ӱдырем каласкален. Тудо ялыште кугу ешыште шочын-кушкын.
Таня тунам 10 ияш лийын. Ик кеҥеж кечын кок пошкудо ӱдыр дене ял воктенысе куэрлаш поҥгылан тарваненыт. Чодыраш пуренытат, икте-весе деч икмыняр метрлан ойырлен, корзиҥгаштым темаш пижыныт. Вашла огыт уж гынат, ӱдыр-влак, тораш каен колташ огыл манын, жапын-жапын йӱкым пуэныт.
Таня эркын ошкылын, йол йымакыже тӱткын ончен, поҥгым кычалын. Ик жап тыге кайымеке, вуйжым нӧлталын – ваштарешыже ала-могай пушеҥге. Тыгайжым тиде куэрлаште ончыч шекланен огыл. Тудо пеш кӱкшӧ огыл, нугыдо укшлаже мланде пелен кият. Тора гыч йыргешке форман вондерла коеш. Таня онча: ик укшышто кӱшнырак пошкудо ӱдыр тупынь шинча, ок тарване. Кофтычкыжат, шовычшат тудынак.
Таня ик жаплан тӱҥын шогалын, тыгай сӱрет тудым ӧрыктарен. «Света, пушеҥгышкыже молан кӱзенат? Тушто мом ыштен шинчет?» – йодын вара. А Света тугак тарваныде шинчен, нимом пелештен огыл. Таня пушеҥге дек лишемын да, укшла гоч кидым шуялтен, Светам тӱкалтынеже улмаш. Но ты жапыште тудым ӱдыр-влак кычкыралыныт. Таня лӱдмыж дене йӱк солнымо верыш чымалтын. Онча: Света ден Оля ваштарешышт шогат. «А пушеҥгыште кӧ шинчен? Тудым миен тӱкалем гын, мо лиеш ыле?» – мӧҥгӧ ошкылшыштла, Таня шонкален каен. Но ӱдыр-влаклан ӧрыктарыше пушеҥге нерген ойлаш тоштын огыл. Мо тиде лийын?
Людмила.
Йошкар-Ола.