7-8 июльышто Чебоксар олаште «Юл кундемын чолга ешыже» («Успешная семья Приволжья») округысо конкурс эртаралтын. Тудо Чувашийысе кугыжаныш опер да балет театрыште лийын. Тиде конкурсышто Марий Элын чапшым Оршанке район гыч вате-марий Елена Леонидовна ден Александр Иванович Рыбаковмыт араленыт.
Вате-марий 23 ий пырля илат. Шуко шочшан ешыште 11 икшыве кушкеш: 4 шке шочшышт, йочапӧрт гыч ончаш налме 7 йоча.
Ава, Елена Леонидовна Рыбакова, мӧҥгыштӧ шогылтеш. Крючок дене пидеш, окна пеледышым кушта, вольыкым онча, тыгак тӱрлӧ поделкым ыштылеш. Тудо тыгак колым кучаш, туризм да спорт дене заниматлаш йӧрата.
Елена Леонидовна Оршанке районышто эртаралтше ече да биатлон таҥасымашлашке ушна. Районысо да республикысе спорт таҥасымашлаште участвоватлен, тудо ялын да районын чапыштым арала. Ача, Александр Иванович Рыбаков, Оршанкысе педколледжыште физкультурым туныктышылан тунем лектын. Кызыт тудо чоҥышылан пашам ышта. Пӧртым шкеак нӧлтен.
Суртоза – шке ялысе калык дружинын еҥже. Тудо ял илышым, школым, йочасадым тӱзатыме шотышто тырша, волонтер пашам шукта. Колым кучаш йӧрата, туризм дене заниматла, ече дене мунчалта, велосипед дене кудалыштеш. Оршанке районысо ече да биатлон таҥасымашлаште участвоватла, шке ялысе «Луч» футбол командыште модеш.
Рыбаковмыт еш казам, чывым, черепахым, колым ашнат.
2019 ийыште нуно «Икшывым ончаш налше эн сай еш» («Лучшая замещающая семья года») республикысе конкурсышто 2-шо верым налыныт, а «Спортым йӧратыше еш» («Спортивная семья») номинацийыште сеҥышыш лектыныт.