22 декабрьыште Йошкар-Олаште Национальный художественный галерейыште «Праздники по-русски» ончер почылтын. Тудым 14 апрель марте ончаш йӧн уло.
Тушто Руш тоштерын (Санкт-Петербург) фондшо гыч живописьын, декоративно-прикладной да калык сымыктышын 95 произведенийже ончыкталтеш.
Совет художник-влак Илья Репинын, Григорий Мясоедовын, Константин Маковскийын, Андрей Рябушкинын, Борис Кустодиевын да Пётр Кончаловскийын пашаштышт руш изосымыктышын XVIII-XX курымласе пайрем темыштым тӱрыснек почын пуымо.
Живописьыште калык пайрем-влак XVIII курымын кокымшо пелыштыже ончыкталташ тӱҥалыныт. Ты жапысе реализм ден классицизм шижалтыт, а сӱрет-влакым идеализироватлыме. Мутлан, ончалза Джон Аткинсонын «Катание с гор на Неве» (1792) картиныжым.
Тыгак историйым палымашым пуртымашат коеш (Дмитрий Осипов «Две девушки в день семика», 1857; Леонид Соломатин «Ряженые», 1873).
XIX курымысо южо мастар илыш-йӱлам ончыктышо этнограф семынат тыршен. Весышт Российысе йӱлам да пайремын историйжым ончыктеныт. Кумшышт социальный йодышым радамленыт. Тыгак совет демонстраций ден парад-влакым, Ӱярня пайремым, юмоҥам кучен кайыше крестный ходым ончыктеныт. Ик эн кугу верым Сеҥымаш кече налын (Глеб Савинов «День Победы», 1975).
Совет жапыште официальный дене пырля идеологийдыме пайрем-влакат ончыко лектыныт: У ий, сӱан, шочмо кече. А южышт илышлан куанымашым ончыктеныт, натюрмортлаште – ӱстембал сийым.
Пайрем сӱрет шун пластикыште, кугече мунышто, гжель сымыктышыште, шкатулкылаште волгыдын коеш.
Эльвира Терентьева.
