24-30 ноябрьыште Йошкар-Олаште Руш тӱвыран арняже эрта. Программе почеш спектакльым, конференцийым, семинарым, лекцийым, «йыргешке ӱстелым» усталык конкурс ден фестивальым эртараш, ончерым почаш, концерт ден кином ончыкташ, уш-акылым пудыратыше модыш дене модыкташ палемдыме.
Мероприятийын тӱҥ площадкыже-влак Марий Элысе тӱвыра да тунемме учрежденийлаште лийыт. Тыгодым руш тӱвыра нерген «Оглянись на предков наших» Российысе фестиваль-конкурсым эртараш шонат. Пайрем арням 24 ноябрьыште 10 шагатлан Чарла кремльыште почыт. 27 ноябрьыште Сеҥымашын 30-шо идалыкше лӱмеш тӱвыра полатыште гала-концерт лиеш. Тушто фестивальыште сеҥыше-влакым саламлат.