Кодшо кугарнян «Кугарня» ден «Ямде лий» газет редакцийын пашаеҥже-влак Кужэҥер район Руш Шой школышто уна лийыч. Ты вашлиймаш ик ий ончыч пашам пырля келшен ыштыме шотышто подписатлыме договор почеш эртаралтын.
Ты школыш пурет веле, волгыдо кумылым шижат. Тидыже школ оралте у да чаткалан кӧра веле огыл, туныктышо ден тунемше-влакын поро кумылан, тыматле койышан улмыштлан кӧра, очыни. Шижалтеш, тыште кажне педагог шке пашажым йӧратен ышта, кажне тунемше школыш уло кумылын коштеш.
Руш Шой школыш йоча-влак Шойдӱҥ, Саламатнур, Аганур, Визымйыр, Марий Шой, Чодыраял, Руш Кугунур гыч коштыт. Чылаже тыште 159 йоча тунемеш.21 туныктышо тырша.
Туныктышна да шкеат тунемна
Усталык шӱлышан вашлиймашна икмыняр ужаш дене эртыш. Ик тӱшкаже Талешке кече вашеш эртаралтше сылнымут погынымашке ушныш. Тыште йоча-влак марий калыкын эртыме корныж нерген ойленыт, талешкына-влак нерген каласкаленыт, кушталтыме мастарлыкышт дене кумылым нӧлтеныт.
Икмыняр журналистна марий йылмым, руш йылмым да литературым туныктышо С.А.Ефремован эртарыме марий йылме кружокын занятийыштыже тунемше-влак коклаште лийын ончышт. «Мутын вийже» теме почеш эртарыме занятий йоча-влакым шочмо йылмын сылнылыкшым шижаш, тудым йӧраташ кумылаҥдыш. Икте гына кумылым волта: тыште марий ешыште шочын-кушшо, марий ача-аван икшывыштлан ынде шке шочмо йылмыштым йот йылме семын тунемаш да кружок полшымо дене мастарлыкым нӧлташ логалеш…
Умбакыже газет пашаеҥна-шамыч мастер-класс-влакым эртареныт. Ик тӱшкаште йоча-влак журналистын пашаж дене палыме лийыныт: материалым раш почын пуаш, интервью годым йодыш-влакым чын пуэдаш, возымо пашалан сай вуймутым шонаш тунемыныт. Вес мастер-класс – «Модыш – уш погыш». Тыште тӱҥалтыш класслаште тунемше йоча-влак марий модыш дене модыныт, туштылан вашмутым кычалыныт. Сеҥалтше-влак тӱрлӧ заданийым шуктеныт: марла почеламутым лудыныт, мурым муреныт…
«Возаш тунемам» секцийыште поэзий кумылан икшыве-шамыч погыненыт. Тыште нуно почеламутым возымаште мом шотыш налаш кӱлмым каҥашеныт, сылнымут саска чатка лийже манын, кӱлеш мутым ойыраш, рифмым кычалаш тунемыныт. Эсогыл кӱчык жапыште икмынярын почеламутым возен шуктеныт. Эн ойыртемалтше паша-влак лишыл жапыште «Ямде лий» газетыште да «Кугарня» газетын «Ужар лышташ» лаштыкыштыже савыкталтыт.
Концерт да спорт
Усталык вашлиймашна «Шуко мут гыч эн чевержым каласен кодем» концерт дене умбакыже шуйныш. Йоча-влакын почеламутым сылнын лудмыштым, кушталтен-муралтымыштым ужмеке, кумыл нӧлтеш. Тунемме идалыкыште нуно уроклаште шинчымашым погымо деч посна мурашат, кушташат, мыскара сценкылаште модашат жапым муыт. Такшым нунылан сай пример уло: туныктышо-влак. Руш Шой школ коллективын чумырымо «Шой ӱжара» ансамбльышт ты кундемыште ынде шукыштлан палыме.
Вашлиймашна волейбол таҥасымаш дене пытыш. Руш Шой школын спорт шӱлышан коллективше тыштат мастарлыкше дене ойыртемалте, сеҥышыш лекте. Ӱшенена, тыгай вашлиймашын саскаже пайдале. Меже вашлийына, ойырлена, а поро шарнымаш чоннам ырыкта. Поснак тунемше-влакын шӱм-чоныштышт волгыдо кумыл лийже, куан шочшо, марий шӱлыш озаланыже. Тек нине шижмаш-влак нунылан ончыкыжым вий-куатым пуэн шогат, шочмо калыкыштым йӧраташ да чапландараш кумылаҥдат.
