Руш калыкын илыш радамже

Йошкар-Оласе национальный художественный галерейыште «Праздники по-русски» ончерым ик тылзыште кок тӱжем утла еҥ ончен.

Ончерлан келыштарыме экспозиций дене экскурсийым группылан да ик еҥланат посна эртарат. У ий каникул годым ончышо-влак поснак ятыр лийыныт.  Марий Элысе изосымыктыш тоштерын вуйлатышыже Е.Бурнашеван палемдымыж почеш, галерейын пашаеҥже-влак январьыште палемдыме почеш 28 экскурсийым эртареныт. Тушко 810 еҥ ушнен. Тылеч посна школышто тунемше икшыве-влаклан музейно-просветительский программе-влакым лӱмын келыштарыме. Тудым ямдылыме годым тунемшын ийготшым, могай классыште шинчымашым погымыжым шотыш налме.

«Пайрем-влак рушла» проектым Национальный художественный галерей Санкт-Петербург-оласе Кугыжаныш руш музей дене пырля визымше гана эртара. Ончерыште руш музейын собранийже гыч 90 утла произведенийым кондымо. Ты ончер 14 апрель марте шуйна. Тудым «Тӱвыра» нацпроект почеш илышыш шыҥдарыме.

Национальный галерейын сайтше гыч налме фото.