29 ноябрьыште Москошто «Мыйын эн сай урокем» Российысе конкурсын открытый финалже тӱҥалын.
Ты конкурс педагог-шамычын профессионал мастарлыкыштым ончыкташ келыштаралтын. Марий Элын чапшым тушто Медведево посёлкысо 3-шо номеран школышто руш йылмым да литературым туныктышо Инна Фёдоровна Гаранина арален. Самырык педагогын наставникше – ты школыштак руш йылмым да литературым туныктышо, кӱшыл квалификационный категориян учитель Елена Николаевна Гаранина.
Финалыште элнан 45 тӱрлӧ регионжо гыч 170 финалист выступатлен. Арня мучко туныктышо-шамыч инновационный урокым кузе эртарымыштым ончыктеныт, пашаште кучылтмо практикышт да опытышт дене палдареныт.
Медведево посёлкысо 3-шо номеран школын ВК-се лаштыкше гыч налме фото.