Марий йылмым кӱчык жапыште тунемаш лиеш мо манын йодыт гын, Светлана, шуко шоныде, «лиеш» манын вашешта. Вет тудо, руш ӱдыр, шкежат пеш вашке марла мутланаш тӱҥалын. А могай сылнын марла кушта – ончен куанет.
Ола гыч – ялыш
С.Ширшова Йошкар-Олаште шочын. Ныл ий марте Медведево район Лӱльпан йочапӧртыштӧ илен. Вара ӱдырым Шернур район Эшполдин ялыште илыше ик марий еш ончаш налын. Да ялыште Светлана марий йылмылан писын тунем шуын.
– Пиалан йоча пагытем Эшполдин ялыште эртен. Ешыште мыйым порын вашлийыныт, йӧратымашым пӧлекленыт, мыят тыгак вашештенам. Пошкудо ӱдыр-рвезе-влак дене йолташ лийынна, модын куржталынна.
Кукнур школыш коштынам. Тунемме, спорт дене кылдалтше, усталык мероприятийлаш эре ушненам. Мураш, кушташ поснак йӧратенам, куштылго атлетике келшен, ече дене таҥасенам. 8-ше классыште физике ден химийлан шӱмаҥынам.
9-ше класс деч вара Йошкар-Оласе Торгово-технологический колледжыш «Товаровед и эксперт потребительских товаров» специальностьлан тунемаш пуренам, – каласкала С.Ширшова.
Туризм сымыстарен
Колледжыштат тудо чолга студентке лийын. Тӱрлӧ мероприятийыш кумылын ушнен, волонтёр пашам шуктен. Кызыт Светлана МарГУ-што физический культур, спорт да туризм факультетыште кумшо курсышто тунемеш.
– Туризмым вияҥдымаште пашам ышташ шонем. Тунеммаште южо дисциплине нелынрак пуалтеш, южыжо, мӧҥгешла, куштылго да оҥай. Практический занятий-влаклан шуко жап ойыралтеш, тыгайже поснак келшат. Профессиональный практикыште кӱлеш шинчымашым налына веле огыл, каненат шуктена, – палдара Света.
«Пиалан улам»
Университетыште эртаралтше таҥасымашлаш да мероприятийлаш студентке эре ушна. Туштат волонтёр паша деч ок код. Университет пеленысе «Марий мурсем» ансамбльыш кумшо ий коштеш. Коллектив дене йочасадлаш, республикысе районлаш усталык номерла дене лектыт, вес регионыштат икмыняр гана лийыныт. Ӱмаште, мутлан, Москошто ВДНХ-ште «Россий» тӱнямбал ончер-форумышто выступатленыт.
Куштымаш, мурымаш гоч шке моторлыкым, кап лывыргылыкым утларак шижат, кумыл нӧлтеш манын палемда ӱдыр. Яра жапше годым Светлана иктаж оҥай сериалым онча, йолташыже-влак дене вашлиеш. Марий муро-влакым колышташ келша, тыгай годым, ӱдырын каласымыж почеш, йолжо шкеак тавалташ ӱжеш. Эн кугу шонымашем шукталтын – пиалан улам, молыжо эркын дене лиеш манын пелешта марий шӱлышан ӱдыр.
С.Ширшован альбомжо гыч налме фото.