Марий Элым Вуйлатыше Юрий Зайцев Ростов-на-Дону олаште Ростов областьысе губернатор Василий Голубев дене вашлийын.
Ты кок регион торгово-экономически шӧрын дене пашам ыштат. Вашлиймаш годым паша лектыш нерген каҥашеныт.
Марий Эл Ростов кундемыш кочкыш сатум (шыл консервым, полуфабрикатым, кондитер кочкышым), бытовой химийым, кӱртньӧ омсам, пу гыч ыштыме арверым, медицине ӱзгарым, оборудованийым, эмым да молымат колта. Образований шотыштат икте-весе дене кыл ышталтеш. Ростов область Марий Элым комбайн-влак, кушкыл ӱй дене пойдара.
Юрий Зайцевын мутшо почеш, Марий Элыште кочкыш сату сай качестван, экологически яндар улмыж дене ойыртемалтеш.
Кок регион торгово-экономический, научно-технический, социальный да тӱвыра направлений-влак дене пырля пашам ышташ кутырен келшен.