Марий Элыште илыше-влакым Российын Президентшым сайлымашке уло еш дене мияш ӱжыт
15-17 мартыште кундемыштына илыше-влакым сайлымаш участкылаш ешге мияш да пӧлекым модылтмашке ушнаш темлат. Чылаже 100 тӱжем пӧлекым модылтат. Тиде Ешын идалыкшылан пӧлеклалтше «Уло еш дене» проектын черетан заданийже лиеш.
Мом ышташ кӱлеш? 15-17 мартыште проектыш ушнышо еш-влаклан сайлымаш участкыш мийыман, шке йӱкым пуыман да еш дене фотом ыштыман. Дистанционно йӱклышӧ-влак компьютер пелен фотом ыштен кертыт. Фотошто мыняр шукырак еҥ лиеш – тунар сайрак. Вара фотом «ВКонтакте» але «Одноклассники» соцкылласе лаштыкышкыда #всейсемьей да #всейсемьей12 проектын хэштегше дене вераҥдыман.
Пӧлек-влакым 4 апрельыште модылтат. Финалыш логалаш чыла 15 заданийым шуктыман.