Самырык-влак шагал годым ялыште илаш коднешт, шукын кугу олаш вашкат. Тыгодым шочмо верын сöраллыкшым, йÿла ден тÿвыра ойыртемлажым ужын-шижын моштышо-шамычат улыт. Тиде радамыш «TeamWise» («Мудреч команде») тÿшкан еҥже-влакымат пурташ лиеш. Нунын дене сентябрьыште Шернур район Кукнур селаште палыме лийым.
Тÿшкам шукерте огыл чумыреныт. Телеграм ден Ютубышто каналым вÿдат. Командыште шымытын улыт (но ты гана визытын толыныт ыле). Кажныже – регион гыч, шке тÿняумылымашыж дене, но ик поро пашамак шуктат. Проектын тÿҥ шонымашыже – шагал еҥан калыкын илышыж дене шке палыме лияш да молым палдараш. Тидыже кузе-гынат шочмо пыжашыш пöртылаш кумылаҥдышаш. Тыге нуно яллаш лекташ тÿҥалыныт. Икымше маршрутышт тыгай лийын: Тамбов, Рязань, Угарман кундемла, Чуваший да Марий Эл республикла, Киров кундем да Моско могырыш. Тиде икымше видеоцикл. Кызыт Арменийыште улыт. Тусо калык нерген материалым ямдылат. Командысе шым еҥ гыч иктыже – Шернур район Эшполдо ялыште шочшо Марина Самохина. Ӱдырым кум ияшыж годым Моско областьыш ача-аваже илаш наҥгаеныт, кызыт Королёв олаште ила. Вич ий марте Марина марла гына мутланен, а кызыт умыла, но огеш кутыро.
– Проект дене келшышын, пелашем руш яллаш лектын кошташ кумылан ыле. Тыге ме маршрутым чоҥенна. Ковам Эльвира Фёдоровна Якимова деке идалыклан 3-4 гана коштам, садлан марий калыкын ойыртемжым ончыктымем шуын, тыге шочмо кундемем планыш пуртыктенам, – каласыш Марина.
Александр Самохин – «TeamWise» проектын тÿҥ редакторжо. Рвезе Рязань кундемыште шочын-кушкын. Тылеч ончыч шыл комбинатыште ужалыше представительлан пашам ыштен.
– Тиде проектым илышыш…
УМБАКЫЖЕ 11 НОЯБРЬЫШТЕ ЛЕКШЕ ГАЗЕТЫШТЕ ЛУДАШ ЛИЕШ.