30 апрельыште Украиныште денацификаций да демилитаризаций военный операцийыште салтакын порысшым шуктымо годым Йошкар-Олаште шочын-кушшо, Россий Вооруженный Вийын старший лейтенантше Дамир Шаймарданов илыш дене чеверласен. Кодшо кечылаште Марий Эл Республикым вуйлатышын пашажым жаплан шуктышо Юрий Зайцев Россий Федераций Талешкын «Шӧртньӧ Шӱдыр» медальжым рвезын ача-аважлан кучыктен.
Кугыжаныш наградым Йошкар-Оласе Воинын Чапше площадьыште пуымо. Дамир Шаймарданов Озаҥ оласе кӱшыл танковый командный Краснознаменный училищым тунем пытарен, тений январь гыч танк ротын командиржылан шотлалтын. Юрий Зайцев колышо салтакын ача-аважлан чаманымашым ойлен, тудын подвигшым кӱкшын палемден.