Барнаулышто 14-16 мартыште эртыше XII Всероссийский ялысе теле спорт модмашын финалыштыже Марий Элын командыже 250 тӱжем марте еҥ илыман кундем-влак группышто икымше верым налын. Медведево район гыч Зуевмыт еш спорт еш-влак коклаште таҥасымаште эн тале лийын.
Куржталаш йӧратыше еш
Шуко шочшан Зуевмыт еш Медведево район Тумерсола ялыште вераҥын. Ешыште кум ӱдыр икшыве кушкеш. Алексей Михайлович Медведево районысо администрацийын физкультур да спорт пӧлкажым вуйлата, пелашыже Чулпан Масгутовна – полиций пашаеҥ, кызыт декрет отпускышто.
Ты районышто Зуевмыт нерген палыдыме еҥже укеат, очыни. Спортым эскерыше да йӧратыше-шамыч нунын нерген поснак сайын палат. Вет ты еш районын чапшым куштылго атлетикыште да ече спортышто эреак кӱшкӧ нӧлта.
– Мемнам ачана Михаил Иванович Зуев спортлан изинек шӱмаҥден. Тудо кундемнан ик эн тале ечызыже, ече дене спорт мастерыш нормативым шуктен. Кызытат спорт дене пеҥгыде кылым куча, ветеран-шамычлан эртаралтше таҥасымашлашке чӱчкыдын ушна. Виктория акамат тудын корныжым тошкен, ече дене – спорт мастер. Нуным ончен, мыят вараш кодын омыл. Ешыштына тренировко, таҥасымаш-влаклан кугу тӱткыш ойыралтын, – мутланымашым тӱҥале А.Зуев.
Алексей Михайлович тӱҥ шотышто куштылго атлетикыште шуаралтын. Кокла да кужу дистанцийлаш куржталын. Кундемыштына эртаралтше таҥасымашлаште чӱчкыдын чемпион да призёр-влак радамыште лийын. Чуваший Республикысе Олимпийский резерв училищыште ик жап шинчымашыжым нӧлтен. Медведево посёлкысо 2-шо номеран школ деч вара Марий пединститутын физкультур факультетышкыже тунемаш пурен. Студент годымат тӱрлӧ таҥасымашыште вийжым терген.
Сборышто палыме лийыныт
2005 ийыште Яльчик ер воктене сбор эртаралтын. Тушко ече дене куржталше да куштылго атлетитке дене заниматлыше спортсмен-влак чумыргеныт. Сборышто Алексей ончыкылык пелашыже, Чулпан, дене палыме лийын. Тунам Зуев кроссым куржталын, ӱдыр ече-роллер дене моштымашыжым вияҥден.
Чулпан – Волжск оласе татар ӱдыр, ече дене спорт мастер, тыгак служебный двоеборье дене Российын чемпионкыжо. Кызытат спорт дене пеҥгыде кылым куча. Теве шукерте огыл ече дене эртаралтше республикысе таҥасымашыште кумшо верым налын.
Кум ӱдыр – кум спортсменке
2008 ийыште марий рвезе ден татар ӱдыр ешым чумыреныт. 2009 ийыште Зуевмытын Диана икымше ӱдырышт шочын. Тудат ача-аваж гай тале спортсменке. Кызыт Чуваший Республикысе Олимпийский резерв училищыште мастарлыкшым тапта. Куштылго атлетике дене Марий Элысе чемпионатын да первенствын ятыр гана чемпионкыжо, призёржо лийын. Ты спортыш толмо деч ончыч куд ий художественный гимнастике дене заниматлен, ик жап куштымашыште шуаралтын. 6-7-ше класслаште куштылго атлетикылан утларак шӱмаҥын.
2014 ийыште Карина шочын. Тудо изинек чулым улмыж дене ойыртемалтын. Тунамак спортсменке лиям манын, пеҥгыдын каласен. Карина куштылго атлетикыште, ече дене ӱчашымашыште, ГТО-што сай лектышым ончыкта. Медведево районысо спортшколышто шуаралтеш.
– Спорт мемнан ешыштына кугу верым айла. Тыглай кечылаште тренировкылаште шуаралтына гын, каныш годым тӱрлӧ таҥасымашыште участвоватлена. Очыни, тидымак ужын, ӱдырна-шамыч спортлан кумылаҥыныт. Вет ала-кунам йоча годым меат, ачанам ончен, спортым йӧратен шынденна. Тыгодым пелашем дене икшывына-шамыч деч утыжым огына йод. Ме нунылан шканышт ойыраш йӧным пуэна. Кумыл уло гын, тек шуаралтыт, вияҥыт, а ме полшаш эре ямде улына. Акаштым ончен, кок ийым эрталтыше Арина ӱдырнат чулым кушкеш. Куржталаш кумылан улмыжо шижалтеш, – шыргыжалын мане Алексей Михайлович.
Режимлан – кугу тӱткыш
Зуевмыт ешыште кажне кече расписаний почеш эрта. Эн ончыч Аринам йочасадыш наҥгаят, вара Каринам тренировкыш ужатат. Ты жапыште Чулпан Масгутовна Корта ече базыште тренироватлалтеш. Вара ӱдыржым школыш наҥгаен кода. Алексей Михайлович 8 шагат эр гыч кас марте пашаште, садлан тренировкылан жапым кастене веле ойырен сеҥа. Тыге арнялан кум-ныл гана шуаралтеш.
Кочкышланат ты ешыште кугу тӱткыш ойыралтеш. Зуевмытын эр кочкыш обязательно лийшаш. Организмым пайдале да витаминлан поян кочкыш дене пойдарыман, маныт.
Еш дене пырля лийме тат нунылан эн шерге. Тыгодым пӱртӱсыштӧ але вӱд воктене канаш тыршат. А туштыжо тренировко деч посна адакат огеш лий, маныт. Садлан спорт, чынжымак, Зуевмыт дене эреак пырля. Куржталме деч посна велосипед дене кудалышташ йӧратат. Ялыште илыше родо-шамыч деке шукыж годым кок ораван «йолташышт» дене кудалыт.
Ынде икмыняр ий Арбаныште Зуевмытын призышт верч куштылго атлетике дене кросс эртаралтеш. Тудым Алексей Михайлович шкеак организоватла. Тушко ты кундемыште илыше, куржталаш йӧратыше-шамыч ушнат.
Арина писе лияш таратен
2021 ийыште Пермьыште Зуевмыт еш ялысе спорт модмашын телымсе фестивальын финалыштыже кугурак ӱдырышт дене таҥасеныт. Тунам нуно кокымшо верым налыныт. Садлан тений тушко лач сеҥашак шонен каеныт. Нунын дене пырля изи Арина лийын. Алексей Михайловичын каласкалымыж гыч изи ӱдыр сеҥымашке шуаш кугу надырым пыштен манын пеҥгыдемдышым.
– Фестивальым моткоч сайын организоватленыт. Кажне гана таҥасымашлашке вашталтышым пурташ тыршат. Тений еш-шамыч дартсым кышкымаште, силовой гимнастикыште, ече дене эстафетыште ӱчашеныт. Икшыве ден ава прессым ыштеныт гын, ача-влак капкылыштым нӧлтеныт. Вара ече эстафетыште таҥасенна: йоча – ава – ача. Карина кокымшо толын гын, Чулпан вес авам ятырлан ончылтен, мыланем эстафетым пуэн. Садлан мыланем финишыш кеч-кузе гынат эн ончыч шуаш кӱлын. Ушыштем пелашем ден ӱдыремын кумылыштым волташ огыл манын, шоненам.
Такшым ме тушко лач сеҥашак шонымаш дене каенна. Но изи ӱдырнам нигӧ дене кодаш да пырля наҥгаенна. Тудо чыла вере пеленна лийын. Икымше кечын таҥасымына годым тренерым але вес спортсмен-шамычым Аринам эскераш йодынна. Садлан кажне таҥасымашыште чылажымат писын ышташ да тудын деке вашкерак пӧртылаш тыршенна. Кокымшо кечын эстафетым куржынна. Тунам ӱчашыме верыш такси дене кудалынна, Арина мален колтен. Эстафетыште ӱчашымына годым тренер эскерен. Тунамат помыжалтмыж деч ончыч толын шуаш тыршенна. Тыге лектеш, Арина мемнам чылажымат писын ышташ таратен да кумылаҥден, – каласкалыш А.Зуев.
Чынжымак, шыргыжаш тарата. Арина кӱлеш верыште да кӱлеш жапыште лийын. Садлан тудынат надырже уло. Но тыгай кугу таҥасымашыште, шуаралтме да вияҥме деч посна лектышыш шуаш неле. Спорт дене илыше да тудын дене шӱлышӧ Зуевмыт еш тидым эше ик гана пеҥгыдемденыт. Ме нунын дене кугешнена!
Еш архив гыч налме фото-влак.