Шыже толмо дене кундемыштына театр-влак шке тургымыштым почыт. Марий самырык театрат тений ятыр у спектакльым темла да У ийым тӧрлен чоҥымо у мотор полатыште вашлияш шона.
КУШТО УЛАТ, МАРИЙ САМЫРЫК ТЕАТР?
Шукын тыгай йодышым пуат мыланемат, артистна да моло пашаеҥна влакланат. Вашештем: кызытеш… марла спектакльна-влакым… южгунам гына… Шкетан театрын полатыштыже ончыктена, а икшыве влак деке йочасадлашке да школлашке шке коштына. Тыге – декабрь марте. А декабрьыште!!! Ме шкенан моткоч чапле полатышкына куснена! Шкеат ужында, очыни, Изи Какшан серыште театрнан тӱжвал сынжым ыштенат шуктеныт, манаш лиеш. Но кӧргыштӧ сомыл эше пеш шуко. Декабрьлан, маныт, товатат, чыла шуктена.
А кызытеш мемнан артистна да спектакль-влакым ужнеда гын, вучена Шкетан лӱмеш театрын полатышкыже. Кунам да могай спектакль лийме нерген Марий самырык театрын сайтыштыже пален налаш лиеш.
«РОШТО УНА» ШЫЖЫМ ТОЛЕШ
Сентябрьыште гына театрыштына кум премьер вуча.
Иктыже (13 сентябрьыште лиеш) – руш драматург Саш Тюжинын самырык-влакын йодышыштым тарватыше «Серафима» драмыже (режиссёр – Эрвина Гордеева) гын, весыже (24 да 30 сентябрьыште ончаш толза) – Миклай Рыбаковын йочавлаклан рушла-марла «Яндар ден Шымавий» легендыже (режиссёр – Зинаида Долгова).
А кугыеҥ-шамычым Марий самырык театрын артистше-влак ты гана лӱмлӧ драматург Валерий Григорьевын пьесыж почеш шындыме «Рошто уна» мыскара спектакль дене куандарат (режиссёр-постановщик — Олег Иркабаев-Этайн).
Марий самырык театр марий драматург Валерий Григорьев дене шукертсек пеҥгыде кылым куча. Тылеч ончыч тудын пьесыж почеш «Ава шӱм» драмым, «Кок ватылан ик марий» комедийым шынденна ыле. Нуным калык кызытат йӧратен онча.
Авторын «Рошто уна» у произведенийже мыскара шӱлышеш возалтын да кызыт мыскара шӱлыш дене театрыште шындалтеш. Тушто действий ола воктене верланыше тачысе марий ялыште эрта. Тиде ялышке Эчан лӱман шкет пӧръеҥ йолташыж деке Рошто пайремлан унала толеш. А кас шумеке, чотак руштылдалше уна марий мӧҥгыжӧ каяш тарвана. Но олашке кудалше маршруткыш вараш кодеш да кенета вучыдымын палыдыме суртышко логалеш. А туштыжо Валентина лӱман шкет ӱдырамаш ила.
Умбакыже действий кузе савырна – тидым спектакль ончымеке пален налаш лиеш. Действийым вияҥдаш полшат Валентинан пошкудыжовлак: весела да чолга Люба ден мыскараче Борис.
А Мӧчӧр кува ден кугыза-шамыч кумылнам нӧлтал колтат веле огыл, спектакльым ончаш толшо калыкым муро-куштымашкак лекташ таратат.
15 СЕНТЯБРЬЫШТЕ рушарнян 16.00 шагатлан Шкетан лӱмеш театрышке «РОШТО УНА» мыскара спектакльым ончаш пагален ӱжына!
Вучена чыландам театрышкына.