Йошкар-Оласе аэропортын терминалжым пашаш колтымо шотышто документ-влакым Росавиацийыш лишыл жапыште колтат
Таче Регионым виктарыме рӱдерын вияш эфирыштыже Александр Герасименко Марий Элыште аэропортын терминалжым да чоҥештен кӱзымӧ да волен шичме полосажым кузе чоҥымо нерген каласкален.
Александр Анатольевич умылтарен: аэропортын у терминалжым чоҥымаш – тиде Марий Эл Правительствын да Республикысе транспорт да корно озанлык министерствын ответственностьышт. А теве чоҥештен кӱзымӧ да волен шичме полосам чоҥымаш – тиде федерал структур-влакын полномочийышт.
Аэропортын у зданийжым чоҥымо пашам январьыштак мучашлыме, кызыт оборудованийым колтымо шотышто чыла йодышым рашемдат. Вес арнян ямдылыме документ пакетым Росавиацийыш колтат, ямде объект эксплуатацийлан официальный разрешенийым налшаш.
Кокымшо объектым – чоҥештен кӱзымӧ да волен шичме полосам чоҥымо шотышто федерал структур-влак заказчиклан шотлалтыт. Пашам мучашлыме жап – 2027 ий.