Коньки дене куржталмаште Российын спорт мастерже Иван Денисов велосипед да ролик дене кудалышташ тунемаш кумылан икшыве ден кугыеҥ-влакым шке командышкыже вуча. Занятий-влак Йошкар-Оласе Сеҥымаш паркыште эртаралтыт. Кунам да мыняр жап тидлан ойыралтеш, тренер дене кутырен келшымек, пален налаш лиеш.
Иванын тӱҥ цельже – еҥ-влакым спорт деке шӱмаҥдаш, таза илыш йӱлам кучаш, икшыве-влакын патриотический воспитанийыштлан шукырак тӱткышым ойыраш. Иванын ойлымыж почеш, спорт ушан-шотан, шонен, илышыште шке верым муын моштышо еҥым кушташ полша. Сандене жапым пайдалын эртараш манын, ролик да велосипед дене кудалышташ туныкташ шонымаш шочын. Кумылан еҥ-влак ушнаш шонат гын, шке роликышт, велосипедышт дене занятийыш толшаш улыт. Чыла йодышым 89600911121 телефон номер дене йыҥгыртен пален налаш лиеш!
Палемдена: Иван – мурызо Татьяна Денисован эргыже.